今年七一遊行，遊行人數繼續成為各界焦點，民陣聲稱有5萬人參與遊行，而警方計算嘅人數只有唔夠1萬人，民陣繼續畀人批評虛報人數。對於民陣年年有違道德嘅吹水行為，囍雨就無意評價喇，因為民陣「吹水是常識吧」；囍雨反而留意到一單幾有趣嘅新聞，呢單新聞話劉小麗喺七一遊行果時「籌經費」，聲稱選舉開支龐大。咦，問題就嚟喇，如果傳媒報道屬實，劉小麗係咪變相宣布咗自己會參選呢？咁講法，佢咪要開支計選舉經費？

囍雨睇7月2日嘅《蘋果日報》報道，話劉小麗同李卓人七一果時分別喺希慎廣場對出擺街站籌款，劉小麗呼籲人捐款果時明言「選舉開支龐大」、「一幅直幡、一張海報都係錢」，有唔少遊行人士響應捐款，亦有市民表示會優先支持劉小麗參選。選舉開支大？直幡、海報都係錢？劉小麗咁講法，算唔算係變相宣布參選先？

宣布參選要開始計經費？

大家唔好誤會，囍雨唔係話劉小麗已經宣布參選，而係質疑佢咁講法，算唔算係變相宣布參選；老實講，佢作為一個政客，宣布參選係冇問題嘅，不過根據囍雨對選舉嘅僅有認知，如果有人宣布參選，理論上由果一刻開始，呢個人用喺選舉上面嘅錢，就要計入選舉經費，包括佢宣傳自己嘅短片、宣傳品甚至用喺網絡嘅錢。喺呢個情況之下，政府負責選舉嘅部門係咪要跟進下呢？

劉小麗參選資格成疑

另一個值得關注嘅問題，係劉小麗同其他「自決」派一樣，佢哋所鼓吹嘅「自決」或者「變奏式」港獨，有可能係唔符合國家憲法同《基本法》架喎，劉小麗係咪一定具備參選資格呢？呢個問題亦都需要相關嘅選舉主任處理。

對於九龍西居民嚟講，成件事就簡單得多喇，如果劉小麗真係可以參選，九龍西居民係咪要投票畀一個宣誓時玩嘢搞到自己畀人DQ，承諾捐人又「有頭無尾」嘅政客呢？所謂「咸魚青菜，各有所愛」，有啲市民支持劉小麗一啲都唔奇，但如果有人只係一心入議會搞事、玩「自決」，囍雨會非常懷疑呢啲人想入議會，到底係議事，定係生事囉！  

原圖：RTHK