仲有兩日就係七月一日，除咗係社會各界慶祝回歸嘅大好日子之外，亦係盲反派搞一年一度重頭戲「七一遊行」嘅時候。之前廣男都評論過，有報章話主辦單位民陣想喺起步點以外增加十個起步點，有搞「公民抗命式」起步嘅嫌疑，不過，到呢刻仍然唔知到底係傳媒誇大，定民陣真係有違法意圖。今日，廣男睇同一份報章嘅新聞，依然大字標題寫住「7.1遊行 民陣以身試法」，話民陣表示各團體可以喺中途加入遊行；其實，民陣或者其他盲反派政客真係想將遊行變成「公民抗命」嗎？咁搞法市民好危險喎。

遊行變抗命 市民真危險？

老實講，七一遊行民陣幾乎年年都搞架啦，大抵上每次遊行都好和平，最多都只係有班激進派自動喺遊行後「加時」，到唔同地方搗亂。如果民陣真係如報章報道所指，表面上喺維園草坪出發，實質容許甚至鼓勵其他政團喺不同地點「聚集」再遊行，係咪變相叫啲人喺無申請嘅情況下集會，隨時要承擔法律風險呢？

有法律界人士指出，根據《公安條例》，每個組織公眾遊行者，都須遵守警方所加入嘅條件，否則有可能會違法，除咗罰款仲有可能要監禁。又或者，如果有市民響應民陣或其他政客所講嘅「自行聚集、起步」，會唔會變成非法集會呢？民陣嘅七一遊行向來以「和平、理性、非暴力」、以腳步表達訴求，如果因為盲反派「激進化」變成遊行都要「公民抗命化」，唔單止自己有可能違法，其實行出嚟支持佢哋嘅市民都好危險架喎，下次仲有人肯Join佢哋嗎？

民陣三思

為著參加遊行嘅市民好，甚至為咗民陣本身都好，廣男都係建議民陣唔好係咁叫人中途加入甚至「自行增加」起步點，因為所謂「以身試法」或者「公民抗命式」起步，市民係唔會Buy架。同理民陣如果玩嘢玩得第一次，之後年年都搞「以身試法」，最終可能會畀市民唾棄架！曾幾何時，「公民抗命」或「違法達義」都有啲市場，但時移勢易，市民都會想做政治「爛頭卒」架喇，回頭是岸呀民陣！事實上，民陣之前搞遊行，都試過有示威者搞事，甚至發生推撞，民陣都只係「卸膊」話係政府同警方責任，今次七一遊行萬一又有市民「有事」，民陣會唔會又話唔關佢哋事呢？

原圖：RTHK