本土民主前線前發言人梁天琦因為參加暴動和襲警需要入獄六年，盲反派人士紛紛用唔同角度為佢開脫，有啲話判刑重、有啲話佢其實係「義士」，其中卸任後仍然經常對香港事務指指點點嘅末代港督彭定康甚至話，港英年代訂立嘅《公安條例》有問題，認真可笑。近日，前刑事檢控專員江樂士就撰文力挺香港法律制度穩如磐石，大大巴掌摑落彭定康度；囍雨經常懷疑，到底係香港法治出咗問題，定係只係有人煞有介事「聲稱」法治有問題呢？

江樂士：彭定康指控無稽

江樂士早前喺《中國日報香港版》撰文，話香港法律制度依然穩如磐石，仲指名道姓回應彭定康對《公安條例》嘅質疑，話如果彭定康早前指「暴動」嘅法律唔夠明確同唔公平係屬實嘅話，法院完全可以用違憲為由廢除呢啲法律，但法院冇咁做到，就證明咗彭定康嘅指控係荒謬無稽。一個係英國前港督，一個係曾經主理本港刑事檢控嘅法律專家，大家信邊個呢？

其實，江樂士除咗義正詞嚴咁駁斥彭定康之外，仲舉咗啲好實質嘅證據證明香港法治未損，例如世界正義工程（World Justice Project）公布嘅全球法治指數，香港位列第16位，排名仲高過盲反派趨之若鶩嘅美國；而英國外交大臣約翰遜亦曾表示香港嘅司法獨立受到尊重。呢啲數字或者在位官員嘅說話，唔係正正摑咗彭定康一大巴掌咩？

馬道立：法庭始終不偏不倚

誠如本港終審法院首席法官馬道立所言，香港各級法庭喺審理涉及到政治因素或者高度關注嘅案件時，始終都不偏不倚，同審理其他案件時無異。囍雨認同江樂士同馬道立嘅講法，一樣認為香港法律制度仍然穩如磐石，法官亦都係不偏不倚處理各類型案件。如果毫無證據、憑一己臆測就攻訐香港嘅法律制度，唔會呢啲人先至係有政治目的呢？各位心清眼亮嘅市民心裡面一定有清晰答案。 

原圖：Takungpao