立法會舊年成功修訂議事規則，限制咗盲反派「拉布」嘅空間。點知盲反派「文攻不成，改玩武鬥」，「拉布」既然難咗，班盲反派就改為衝出主席台、離座搗亂去阻撓會議。議會外呢？就不時做埋晒啲毫無道德兼踩界嘢，民主黨許智峯「搶手機」就係最好例子啦！可惜，現時立法會議事規則其實係規管唔到呢類行為，班盲反派做完後全無後果可言，近日建制派就建議再修訂議事規則，囍雨梗係第一時間舉腳贊成啦！

被人DQ 與人無尤

進一步規管立法會議員喺議會內外嘅行為，根本就係民心所向，亦係香港市民共識，根據初步建議，建制派認為可以考慮規定一旦有議員被驅逐出會議廳後，喺特定時間內就唔可以再參與會議，甚至需要罰款等等。盲反派議員作為暴行嘅始作俑者，梗係反射性反對啦，個別盲反派議員話喎，唔需要設立懲罰機制，質疑呢個只係「變相DQ」議員咁話。嗱，呢啲咪就係歪理囉，等囍雨K.O.你班人啦！

首先，囍雨想喺度問一問一眾盲反派議員，如果你開會時唔衝出主席台、唔擅自離座搗亂會議、議會外唔做埋晒啲違法同極卑劣行為，試問點可能畀人罰？又點會畀人「停賽」？話修訂議規規則係「變相DQ」議員嘅盲反派撫心自問，有冇人迫你哋去破壞規則同秩序？設立懲罰機制，想令到議會更暢順，咁都叫做唔公平？

立法會議員必須向全港問責

第二，盲反派成日話，自己做嘅係獲得選民支持嘅「抗爭」，所以立法會唔應該規管佢哋嘅種種「抗爭」行動同埋會議廳外行為；老老實實，盲反派咁講就真係大錯特錯喇，首先，立法會議員面向嘅係全香港市民，並唔係一小撮選民，你做到立法會議員，面對嘅就係全香港市民，因為你哋係領受公帑、擁有公權力嘅公眾人物，所以必須受到全香港監督，絕對唔係只向小部份人問責。既然係咁，立法會當然有責任規管立法會議員嘅所謂「抗爭」，甚至議會外嘅不良行為啦！

囍雨上面所提嘅，根本唔係乜嘢大道理，盲反派並唔係唔識，只不過係「詐唔知」啫！香港立法會畀盲反派搞亂咗差唔多有年喇，點都係時候嚟個了斷，好好處理啲暴力、欺凌同惡質行為啦，作為納稅人之一，點解要我每日睇住班盲反派事實唔做，只係走去做政治SHOW先？

原圖：中通社