就到七一，又喺盲反派搞七一遊行嘅「大日子」，同上年一樣，主辦七一遊行嘅民陣借唔到維園球場做遊行起步點，要喺維園球場以外嘅地方起步。本來遊行喺咩地方起步，應該係警方經過安全等考慮因素作出最終裁決，但民陣就好似非喺維園球場起步不可咁，話就算佢哋喺維園草坪起步，都會由得市民喺沿途加入；根據《蘋果日報》嘅報道，仲引述消息指民陣打算叫唔同團體喺唔同地方集結、「打游擊」。到底係民陣想玩嘢？定係《蘋果日報》想煽動市民玩嘢，變相喺遊行玩「公民抗命」，廣男覺得呢單嘢真係耐人尋味！

「公民抗命」真唔真？

之前已經有報道講過，民陣考慮用「公民抗命」、即係唔服從警方指示嘅方式做遊行起步，間接令參加市民要承受違法風險；如果《蘋果日報》引述消息嘅報道為真，民陣真係打算叫唔同團體喺銅鑼灣、灣仔近十個唔同地方集結，以向警方表達不滿嘅話，據報已經有政團嚮應佢哋嘅建議。如果真係咁，啲喺維園草坪以外集結嘅團體以至市民，會唔會誤墮法網呢？理論上如果想喺某個地方集結、遊行而又超過某個人數，好似要申請架喎！

另一個可能性，會唔會係民陣雖然唔滿意警方決定，但最後都係決定喺維園草坪起步而唔搞事呢？咁都有可能，但如果係咁嘅《蘋果日報》所引述嘅消息嚟自邊度？準唔準確呢？咁高調話民陣「擬增10起步點反制警方」又冇指名道姓係邊個講嘅，係咪想煽動市民搞事先？呢件事真係相當有可疑。

不應拿市民做籌碼

出於良好意願，廣男梗係唔想民陣喺七一遊行玩「增加起步點」或者「公民抗命」式起步啦，因為佢哋想搞事，係佢哋嘅事，廣男相信參加七一遊行嘅市民，絕大部份都只係想用腳步表達訴求，唔係想做政治「爛頭卒」！如果民陣想保持佢哋向來嘅「和理非」嘅作風，又唔想攞市民嚟「靠飛」，最好都係唔好搞咁多嘢喇。今時今日，犯完法仲話畀人「政治打壓」博同情，唔work架喇！ 

原圖：RTHK