盲反派向來擅長「創造」名詞，然後再將唔同名詞扣落整個建制身上，就算冇嘢都會畀佢哋講到「好似有問題」咁。為咗合理化一切「暴力」、違法行為，違法佔領發起人、港大法律學者戴耀廷近年創造咗「威權政府」以至「威權法治」等名詞，一句講晒就係反政府人士犯法、搞事就得，政府依法檢控就唔得！戴耀廷今日喺《生果報》撰文，聲稱「威權法治」入侵立法會，批評立法會主席梁君彥這樣、嗰樣又不是。不過大家撫心自問，到底戴耀廷講緊咩呢？點解盲反派喺議會搞事就乜都得，立法會主席依例行事就唔得呢？

戴耀廷又顛倒是非

其實當戴耀廷講到甚麼「威權」嘅時候，其實講嚟講去都係果個意思，就係盲反派做乜都得，其他人如果有動作，就算合法、合理都係「被打壓」。喺佢最新嘅文章入面，就聲稱「威權法治」侵佔立法會，又話梁君彥唔應驅逐盲反派議員、叫保安做嘢等等。咁講法，即係一班盲反派議員不斷搞事，都唔可以趕佢哋出會議廳，由佢哋喺議事堂做騷？

戴耀廷呢種老屈中央、政府以至立法會嘅風格，講到底係明示「為求達到政治目的，可以不擇手段」，呢一種鼓吹反政府就可以為所欲為嘅「作風」，其實係秉承咗佢之前所提倡嘅所謂「違法達義」精神。盲反派犯法？冇問題架，因為係政府「不義」在先嘛！

無規矩可言的世界

戴耀廷言論合理唔合理，相信大部份市民心中已經有清晰答案。事實上今時今日喺立法會裡面嘅盲反派，根本就極之霸道，只要議會裡面有佢哋稍稍不滿嘅議案，盲反派人士唔投票唔在講，甚至連開始討論都唔得！戴耀廷慢慢喺度開創緊一種以「威權」為名、幫助自己人搞事為實嘅風氣，囍雨認為如果畀呢種歪風「遍地開花」，長遠而言可能畀違法佔領更危險，實在要小心小心！

原圖：Takungpao