由民主黨發起、聲稱追究前特首梁振英喺「UGL事件」上責任嘅「天下為公」，今日下午又有「新」動作。該黨立法會議員林卓廷同尹兆堅等一班政客，大鑼大鼓開記者會交代「新」進展，但講足三十分鐘仍然「冇料到」；錢就足足用咗眾籌得嚟嘅四十幾萬，但就拎唔出實質證據證明梁振英有違法，甚至連少少利益衝突都證明唔到，話呢個行動其實係「天仙局」，真係一啲都冇講錯。

由始至終拿不出證據

其實好簡單，「天下為公」成個記者會講來講去就係講唔出到底梁振英有咩唔妥，反反覆覆就係批評梁振英冇拎出實質證據去證明自己清白，其中林卓廷最好笑，竟然走去呼籲梁振英自己交出證明自證清白，話咁先至有說服力喎。

大佬呀，搞足兩個幾月、眾籌咗市民二百幾萬，到今日原來仲係得個「吉」！囍雨喺呢度真係想同林卓廷同埋嗰個民主黨黨籍律師吳思諾商榷一下，到底佢哋所受嘅係邊度嘅法律訓練，居然係要求被指控嘅一方去自證清白，而唔係由指控他人嘅一方拎出證據去證明所講屬實？如果係咁，你班人籌嗰二百幾萬又幾爽喎，三日唔埋又走出嚟隊呢樣、隊嗰樣，畀你哋指控嗰個咪好無辜？

民主黨口講口賠 反要梁振英「自證清白」

記者會之中，又以吳思諾表現最令人失望。身為一個執業大律師，竟然話辯護一方冇拎證據出嚟，所以口供嘅效力喺法庭上考慮比重唔會多；佢識咁講就啱晒啦，咁請問吳思諾一句，你哋又有咩證據呢？你哋口講口賠，乜又認為法庭會接納呢啲無的放矢嘅指控咩？節省少少啦！

不過咁，話今次「天下為公」冇新嘢又唔公道嘅，民主黨班政客挖空心思，終於畀佢哋轉到個藉口出嚟，話港鐵前主席錢果豐當日出任UGL非執行董事後冇耐，就獲時任特首梁振英委任繼續做港鐵主席，又港鐵又同UGL有生意往來，質疑事有蹊蹺咁話喎！

政府無權干預港鐵商業合約

去到呢度，相信全香港人都明白乜嘢叫做「攬炒」。首先，錢果豐早於2007年左右已經開始做港鐵主席，梁振英當時都未做特首，而佢上任後安排一個具經驗嘅人繼續領導港鐵根本係正常不過嘅選擇！其次，錢果豐做UGL非執行董事，本身同佢做港鐵主席其實亦冇任何衝突可言，因為港鐵董事局一早就知悉事件，咁究竟有咩利益衝突可言呢？

再者，囍雨份人好奇又八卦，聽完「天下為公」記者會後即時上網搵資料，發現港鐵發言人原來早已經解釋過，話香港政府無權干涉港鐵嘅合約安排，而呢啲合約亦係以「暗標」方式（即係唔知道投標公司嘅名）由港鐵董事會成員負責評估。囍雨花幾分鐘已經搵到嘅資料，民主黨班議員同律師點解會搵唔到？

消費梁振英只為抽水

講真，梁振英一早已經解釋，話自己從冇介入過地鐵同UGL之間嘅商業行為。冇就係冇，到底民主黨認為梁振英可以點「自我證明」冇干預？事實上係冇可能做到，民主黨咁做，根本就係混淆視聽，想藉住消費梁振英呢位國家領導人去撈政治油水，香港市民，希望你哋唔好再畀人利用喇，呢班政客並唔係有心尋求公義，只係想抹黑政敵梁振英咋！

原圖：天下為公Facebook專頁