要數城中最熱門話題，相信都非港鐵沙中線工程出現嘅種種問題，特區政府反應亦算快，即時成立獨立調查委員會跟進事件，算係回應咗社會要求。同其他傳媒一樣，《蘋果日報》連日大篇幅報道事件，起初都好好地只講工程施工失當等問題，但唔知係唔係賊性難改，呢份所謂「報紙」硬係要將事件同前特首梁振英扯上關係，報道見街後，梁振英迅速澄清，大巴大巴咁摑落《蘋果日報》塊面度，你話呢份報紙係唔係攞嚟衰呢？

混淆視聽 人格謀殺CY

話說，《蘋果日報》好鍾意針對CY，任內炒作UGL事件一次又一次人格謀殺CY，早兩日又嚟料，話被指喺沙中線工程上面施工有問題嘅承建商禮頓，除咗承接多項港鐵工程，原來亦同澳洲UGL公司同屬CIMIC集團，而且喺梁振英任內獲批多項政府工程咁話。《蘋果日報》刻意提起UGL個名，無非係想令人將事件同涉及梁振英嘅「UGL事件」拉上關係，用心其實已經好明顯。

咁講到底，《蘋果日報》所講嘅係唔係事實呢？係，不過係「非常斷章取義」兼「有誤導」成份嘅「語言偽術」！梁振英解釋，查實佢個人同UGL呢間公司，自2013年12月，即係「UGL事件」裡面嗰份合法合情合理嘅「離職協議」完結後已經「完全冇關係」，而CIMIC集團其實係喺2016年11月先至成為UGL嘅大股東；簡單啲講，梁振英本人同CIMIC，以及由CIMIC持有嘅禮頓，從來都冇直接或者間接關係，佢本人亦冇參與過任何政府工程合同嘅審批。

《蘋果日報》含沙射影 手法卑鄙

其實，以上嘅股權變動內容完全係公開資料，《蘋果日報》作為「反對派媒體喉舌」，冇理由連呢啲基本資料都唔知！刻意將啲不盡不實內容大字標題寫出嚟，講穿咗咪就係要抹黑同老屈梁振英，想等一般市民覺得沙中線工失誤係同梁振英有關，呢種手法咪就係「卑鄙」囉！

仲有，根本喺梁振英2012年出任特首之前，禮頓呢間大公司已經接咗香港多項大型基建工程，《蘋果日報》自己都有登出嚟架，好似2010年高鐵香港段工程，以及2011年港鐵南港島線工程咁，禮頓一早都已有份做，即係話佢哋並唔係喺梁振英任內先至獲得呢啲工程囉，《蘋果日報》喺同一篇報道裡面寫埋晒啲自相矛盾嘅內容，到底仲有乜嘢資格做傳媒？

原圖：Takungpao