之前廣男就寫過喺咁多國家隊裡面，廣男因為支持美斯所以比較想阿根廷攞今屆世界盃；呢頭講起美斯，轉頭就發現一間有無啦啦涉及美斯嘅港聞，話說人稱「釘書健」嘅民主黨黨員林子健之前「老吹」自己畀「內地人擄走」，又話件事同佢寄張美斯嘅親筆簽名相畀人有關，點知隨即被警方發現佢涉嫌報假案並將佢拘捕。由於件事已經去審訊階段，廣男當然就唔會提案情啦，今次想講係當日陪住林子健係威係勢開記招嗰民主黨成員，原來冇晒影囉，搞到「釘書健」自己都要喺Facebook慨嘆友情只價值「$300」。「釘書健」，枉你身為民主黨成員多年，真係今日先睇清楚呢班人真面目？

李柱銘、何俊仁、林卓廷在哪裡？

廣男仲記得當日搞記招，話自己畀疑似內地人士「挾走」，仲喺佢大髀釘咗好多口釘虐待，當時民主黨一眾元老，包括李柱銘、何俊仁，同埋立法會議員林卓廷等等都撲出嚟開記者會聲援；點知一個「屈尾十」，「釘書健」就因為懷疑「自編自導自演」、報假案畀警方拉咗，大難臨頭各自飛下，原本同「釘書健」一齊開記招、抹黑內地嘅民主黨中人梗係即刻無晒影，而家「釘書健」單嘢上法庭，當然都係唔會見到民主黨人撐場啦！

據講，當初力主「釘書健」開記者會嘅，正正係班民主黨大哥，咁到今日出事，呢班人有冇再幫過佢呢？答案係「冇」，就連喺資深大律師名冊排名第一嗰個李柱銘亦唔見得有幫助過佢，至於何俊仁、林卓廷等人就更加係縮埋一邊啦，唔通利用完你仲畀你「連累」咩！民主黨呢班人只不過係為利益而不擇手段抽水嘅政客，以為佢啲係義氣仔女，林子健你真係太天真、太傻囉。

許智峯待遇類同

事實上，喺立法會強搶女政府人員手機嘅許智峯，處境同「釘書健」都有啲相似，民主黨「自然反應」都係先同許智峯切割（講得好聽啲叫大義滅親啦，但佢哋後來竟然又無限期押後紀律聆訊許智峯）；不過許智峯較好彩嘅地方係，由於佢仲身兼立法會議員，如果民主黨果斷KO佢，即係放棄或者廢咗自己喺港島區唯一嘅立法會議席。可惜，林子健甚麼都不是，畀人放棄當然係必然。話時話，李柱銘仲未就事件交代過喎，到底佢縮咗去邊呢？佢就好啦，又娶新抱又剩，可憐林子健一個人面對官司，真係可憐囉。

原圖：Takungpao