被盲反派「拉布」拖延多時嘅高鐵「一地兩檢」方案終於完成審議，意味香港高鐵有望喺今年第三季通車。老實講，雖然方案已經通過咗，但盲反派係絕對唔會放棄佢哋對「一地兩檢」嘅抹黑嘅，例如話高度自治受損、《基本法》受破壞云云，簡而言之就係要「販賣恐懼」，等啲市民怕咗高鐵。但大家唔好咁天真，盲反派班議員可能呢頭反完高鐵，轉頭就會好「高興」咁搭高鐵，然後大讚服務好，甚至會拉隊喺地區搞「高鐵團」，名符其實「佔了便宜又賣乖」！

販賣恐懼 慣用技倆

打從社會開始討論「一地兩檢」開始，盲反派政客就係咁喺度恐嚇市民，囍雨記得最離譜嘅講法，就係話市民行到西九高鐵站附近都有可能畀人拉入去，甚至拉埋番大陸。呢啲盲反派用咗幾十年嘅舊招式，叫「販賣恐懼」，英文叫scare mongering，試問如果唔能夠引起人恐慌，又邊會有市民「驚埋一份」，同佢哋一齊反對「一地兩檢」呢？

無論盲反派點抹黑都好，佢哋始終都敵唔過一個事實，就係「一地兩檢」方案根本唔係要割咩地畀中央（香港土地本身就屬於中央所有），而係便利香港市民往來內地嘅民生措施。大家諗一諗，如果冇「一地兩檢」，到底係香港市民麻煩，定係內地有麻煩呢？盲反派今次不顧民意反「一地兩檢」，仲敢自己係「民主派」，真係唔怕笑死人？

盲反派將來「高高興興坐高鐵」？

更可笑嘅係，囍雨預計得到，呢班開口埋口要反「一地兩檢」嘅盲反派政客，將來極有可能輕輕鬆鬆去西九搭高鐵番內地，就好似東江水問題咁，明明盲反派成日質疑東江水，但係佢哋唔會用少啲水，如果cut咗東江水，要佢哋制水，佢哋更加唔肯過你！

早幾日，囍雨見到網上見到一張民主黨立法會議員尹兆堅嘅辦事處搞高鐵「逍遙遊」嘅宣傳品，再諗起尹兆堅為咗反「一地兩檢」喺立法會玩衝擊，呢種咁矛盾嘅「政治人生」，真係令人忍俊不禁！尹兆堅，遲啲高鐵香港段開通，你搞平價高鐵團記得通知囍雨呀，我真心想搭高鐵架！（笑）

原圖：Takungpao