前幾日《蘋果日報》母公司壹傳媒公布業績，2017/18年度勁蝕近五億元，可以話係一片愁雲慘霧；不過，對於「生命力」極強嘅壹傳媒，大家真係唔駛太「擔心」佢哋往後嘅發展，因為佢哋極可能已經搵到新方向，喺佢哋公布入面，話「一帶一路」倡議重新整頓服務及消費行業經濟，集團已經準備就緒、抓住該等機遇。雖然壹傳媒尤其係《蘋果日報》過去非常喜歡踩低「一帶一路」，但佢哋而家「覺今是而昨非」，大家應該歡迎壹傳媒一同把握機遇！

過去不斷借「一帶一路」搬弄是非

講起壹傳媒或者《蘋果日報》，除咗素來反政府、反中央之外，基本上無論係國家嘅「一帶一路」倡議或者粵港澳大灣區發展，壹傳媒都好鍾意用冷嘲熱諷嘅方式對待，例如前年時任特首梁振英發表《施政報告》，講香港點把握「一帶一路」機遇嘅建議，《蘋果日報》就喺報道話「輿論批評推一帶一路是為了討好中央」、引述民主黨黃碧雲批評《施政報告》似「『一帶一路』市長報告」、引述公民黨梁家傑話「一帶一路」係「虛無縹緲嘅香格里拉」，甚至連藝員嘅評語都搬埋出嚟鬧梁振英。睇佢哋個款，真係好討厭「一帶一路」下喎！

不過，時移勢易，而家壹傳媒喺發布業績嘅公布入面講明要抓住「一帶一路」等機遇，大家唔好理佢啲編採人員係咪會繼續貶低「一帶一路」，起碼壹傳媒啲高層甚至老闆都知道要把握好「一帶一路」機遇；所以話呢，做生意嘅，始終都係要睇下個市場點發展，經營一間公司總唔能夠剩係玩政治炒作嘅，如果早啲醒覺，壹傳媒可能就唔駛蝕錢蝕得咁「甘」啦！

世界潮流 浩浩蕩蕩

所謂「世界潮流，浩浩蕩蕩，順之者昌，逆之者亡」，喺以千百年計嘅歷史裡面，遲幾年醒覺，係冇乜問題嘅，大家千祈唔好嘲笑或者歧視壹傳媒；更正確嚟講，大家應該歡迎壹傳媒同大家一同把握「一帶一路」嘅機遇。至於壹傳媒係真心對待「一帶一路」，定係寫段嘢「畀啲願景」嘅股東，大家就拭目以待啦！ 

原圖：Takungpao、nextdigital.com.hk