本土民主前線前發言人因為暴動、襲警罪成被判入獄六年，對於反對暴力嘅社會人士嚟講，呢個判決明顯適當亦都起到警剔作用，但別有用心嘅盲反派人士，有啲就話《公安條例》成為打壓工具，有啲就話判刑過重，而向來鍾意借香港事務抽水嘅前港督彭定康，亦都話《公安條例》被用作「政治用途」；囍雨真係十分好奇，《公安條例》乜唔係港英時代承襲落嚟嘅咩？啲政客鍾意果時就話要擁抱英國套法治，到唔啱用果時就話套法律用嚟打壓人？咁搬龍門法，真係畀盲反派啲政客玩晒啦！

湯家驊：暴動罪由英國而來

對於彭定康以至其他盲反派政客諸如公民黨楊岳橋等政客嘅謬論，囍雨就覺得用資深大律師湯家驊嘅說法去回應佢哋就最妥當喇。湯家驊表示，而家香港所用嘅暴動罪定義，唔係由特區政府定出嚟，更加唔係由共產黨定出嚟，而係由英國《普通法》而嚟，如果話判刑重都可以理解，但如果話係法官濫用法律程序將梁天琦定罪，就完全係顛倒黑白嘅講法喇！

事實上，有資料顯示暴動罪係喺1970年代納入《公安條例》，最高刑罰係監禁10年，而今次梁天琦被判六年，係唔係真係判得重，各方人士當然可以作出唔同評價啦；但如果話法律變咗政治工具，或者「專用嚟」對付盲反派人士，咁就好明顯係想將政治凌駕法治，直接或間接向法庭施壓，等佢哋要依法作出判決時有所避忌，而囍雨認為真正想將政治帶入法庭嘅，根本就係盲反派人士先啱。

法律豈能取決於觀感？

近年法庭處理過唔少牽涉到政治人物嘅案件，終審法院首席法官馬道立都提到，呢啲案件有一個特點，就係好多人對事件都有定見，對法律體制嘅觀感，取決於佢哋係咪滿意判決，但呢啲人都忽略咗法庭職責係恪守法律，亦忘記咗法庭只係處理法律問題。

囍雨覺得馬道立曾經講過嘅呢番說話，正正亦都係今次盲反派政客以及梁天琦支持者佢哋嘅一個共通點，就係「我理得你」法律係點，總知你重判政見同我一樣嘅人，咪就係唔得囉！但大家諗下，如果法庭點判決取決於社會部份人嘅取態，咁法庭就冇咗獨立性，香港嘅法治亦都會從此崩壞！ 

原圖：RTHK