民主黨立法會議員許智峯公然喺立法會「強搶」女EO手機，事後畀警方以涉嫌觸犯「普通襲擊」等罪名拘捕；錯到離晒譜嘅許智峯喺「不認不認還須認」嘅情況下，出嚟向公眾鞠躬道歉，表現有「好有悔意」咁嘅樣，但事隔一輪，當擺明包庇佢嘅民主黨都表示會無限期抽後許智峯嘅紀律聆訊之後，許智峯似乎又「活躍」起嚟，仲公開話自己只係「阻止惡行嘅衝動」，要追究政府「違法行為」云云。搶完人嘢，畀人拉完自己又道歉完，許智峯見眾怒稍為平息又出嚟「攞尾彩」，呢啲算唔算係「瘋言瘋語」呢？

事過境遷 過橋抽板博大霧？

對於許智峯繼續聲稱政府行為「違法」，囍雨只能夠話許智峯係胡說八道，因為連私隱專員都講到明，政府喺公眾地方記錄議員出入資料，根本冇無違反任何私隱法例；許智峯而家認完錯仲要想繼續話政府「犯法」，擺到明就係老屈！至於佢話接受唔到政府監視議員嘅「扭曲制度」，嚴格嚟講應該係市民接受唔到盲反派嘅「拉布」行為，絕對肯定政府為確保議員運作而作出必要措施先啱。

事實上，囍雨對於許智峯「變臉」感到極度反感，明明自己已經走出嚟向公眾、女EQ鞠躬道歉，擺出一副懇求公眾原諒嘅樣子，而家公眾嘅憤怒稍稍平息，事情「丟淡」了，佢就即刻將悔意收埋晒，講到自己都係「被迫」搶嘢咁。事情發展落去，囍雨相信許智峯會秉承盲反派「以法達義」再「走數」嘅精神，面對司法程序嘅時候好有機會會唔認罪，甚至諉過於政府！

盲反派永遠「冇錯」

許智峯嘅一言一行，囍雨認為完全係盲反派一向以嚟嘅作風，每一次當佢哋有人犯錯、涉嫌違法甚至真係畀法庭判咗有罪，佢哋基本上都會將責任推喺政府或其他人身上，又成日將「政治打壓」放喺口邊。違法佔領，係政府「錯」；爆廉署案件內容，係政府「錯」；甚至發生暴動案嘅時候，都可以話係政府「錯」。許智峯以至其他盲反派人士，做錯咗，假道歉，真卸責，甚至將所有事都講成係政治迫害。究竟係有「被逼害妄想症」、定係喺度詐癲扮傻？心清眼亮嘅大家「是懂的」！

原圖：Takungpao