之前有新聞話搞開「民主自決」嘅「香港眾志」，由於佢哋嘅「暗獨」立場違憲違法，好難再參選立法會甚至係區議會選舉，所以「香港眾志」決定轉型，變做專注喺公民社會嘅「民間政治團體」。對於「香港眾志」呢個轉向，有人已經分析「香港眾志」擺明係要將「獨」害散播到社會每一個角落；點知佢哋嘅真正目標，係要將「港獨」散播到世界唔同角落先真；佢哋嘅常委敖卓軒，日前就到美國出席名為「西藏、香港、台灣圓桌會議」，喺度詆譭中國，仲話要「喚醒香港年輕人爭取自由的意志」，試問呢啲播「獨」者，又點可以畀佢哋參選呢？

「三獨」論壇 輪流抹黑中國

廣男暫且將呢個論壇稱為「三獨」論壇，因為無論係西藏、台灣抑或香港嘅代表，基本上都係「獨」味甚濃。喺呢個會議上，「台獨」份子林飛帆就聲稱台灣、香港同西藏都面對「中國的壓迫」，所以需要更多嘅聯合，遠程目標係擺脫中國持續的壓迫同「威權控制」；而「香港眾志」常委敖卓軒，就話中國一直「破壞」新疆、西藏、香港同台灣嘅法律同制度，要意識到「中國領導人」嘅整體「擴張」策略對世界自由同民主帶來嘅「風險」。綜合呢啲講法以及「香港眾志」堅持要搞「民主自決」嘅聲明，其實意思就係幾個地方嘅獨立勢力要合作，搞好「台獨」、「港獨」嘅「大業」啦！

老實講，廣男絕對唔覺得唔參選立法會或者區議會，就代表「香港眾志」呢班獨派可以隨便喺香港甚至去到海外播「獨」；大家諗下，除咗「香港眾志」之外，其他「港獨」推手例如戴耀廷等人，其實都係不斷咁或明或暗地散播「港獨」訊息，如果一直由佢哋將歪埋論述再發大，情況隨時嚴重過持續咗79日嘅違法佔領。

如何應對「獨」害？

對於一班「獨」客無日無之咁喺香港（包括喺公開場合、校園）甚至外國播「獨」，廣男就喺度諗，係咪真係無方法或者無法例應付到呢班人呢？而如果戴耀廷或者一班青年直頭喺校園播「獨」、向學生洗腦，我哋係咪又要得個「睇」字，眼白白睇住啲年輕人變做「政治爛頭卒」？廣男感覺到，如果情況持續，香港將來就算經濟、社會發展Okay，都必定有大亂發生！

原圖：香港眾志Facebook專頁