立法會正喺度全速審議高鐵「一地兩檢」方案，盲反派雖然聲稱「唔夠時間」審議草案，但就一直「拉布」，一時「點人數」，一時又提出「終止待續」，試問如果覺得唔夠時間審議，又點會仲要「拉布」晒時間呢？而盲反派當中最令人覺得詭異嘅，莫過於資訊科技界立法會議員莫乃光，佢噚日仲同記者講因為立法會主席梁君彥限制時間搞到「因快得慢」，囍雨又想問下莫乃光，乜罪魁禍首唔係「拉布」嘅盲反派咩？佢今日咁出力反「一地兩檢」，第日又會唔會扮無事搭高鐵，然後大讚搭高鐵方便呢？

不夠時審議但「拉布」

近日立法會二讀高鐵「一地兩檢」方案，囍雨覺得盲反派繼續凸顯出佢哋嘅矛盾本色；事關之前梁君彥為審議時間「劃界」，盲反派仲係咁話唔夠時間審議，如果真係怕唔夠時間審議，最好嘅應對方法唔係盡量爭取機會發言，表達自己對方案嘅意見咩？而家係咁「點人數」或者提出「終止待續」等等，擺到明就唔係想認真審議，而係想「拉布」拉死方案啦！

至於身為盲反派召集人嘅莫乃光，囍雨更加覺得佢一番說話非常可笑，盲反派明明喺度「拉布」，佢噚日會後見記者果時，仲好意思指責梁君彥，話方案唔能夠完成二讀係因為梁君彥限制議員發言時間，而家「因快得慢」都係梁君彥咎由自取，仲話會堅持畀未發言嘅議員發言。囍雨又想問下，咁想畀其他議員發言，佢哋仲「拉布」，莫乃光咁講嘢，擺到明就係自打咀巴。

莫乃光早有縱容「拉布」劣績

事實上，莫乃光縱容「拉布」都唔係第一次架喇，佢幾年前身為資訊科技界議員嘅時候，囍雨仲記得佢雖然口口聲聲話自己都係支持成立創新科技局，不過當時盲反派係咁「拉布」，三番四次想拉倒創科局，身為業界代表嘅莫乃光對於「自己友」嘅「拉布」惡行完全若無其事，又唔見佢譴責啲盲反派議員，令到好多人都不值佢行為。當莫乃光連關係到業界利益嘅方案都可以任由其他人「拉布」，「一地兩檢」方案佢又點會重視呢？

就好似去完大灣區考察話大灣區發展快、香港要努力一樣，唔好畀囍雨批死莫乃光呢班盲反派，到高鐵香港段通車之後，莫乃光呢啲政棍一定會高高興興咁去搭高鐵，而自己今日反「一地兩檢」嘅「拉布」行為，佢哋梗係當無咗件事啦！

原圖：RTHK