「香港眾志」核心成員周庭，早前因為所屬政黨「香港眾志」開宗明義提倡違反《基本法》嘅「民主自決」理念，結果被選舉主任撤銷參選立法會資格。所謂「民主自決」，即係話「港獨」係香港選項之一，剩係呢一點都知呢班人係想搞「變奏式港獨」啦！或者因為知道已經到咗窮途末路，「香港眾志」近日竟然發表所謂「轉型宣言」，話要告別議會路線，改為「立足民間」嘅政治團體。囍雨認為，「香港眾志」咁做，除咗意味佢哋唔參選／冇得參選之外，更重要係佢哋終於承認「港獨組織」呢個身份，明目張膽搞風搞雨。

不認不認還須認

以往「香港眾志」一直拒絕承認自己係「港獨」組織，只係反覆話自己支持「自決」。咁到底「自決」係咩呢？查實佢哋個最重要搞事嘅秘書長黃之鋒一早已經講過架喇，咪就係「港獨」係香港選項之一囉！黃之鋒口中「港獨」係選項之一係咩意思呢？意思就係，佢哋個組織有藉口可以用不同方法去推廣「港獨」理念、可以去拎社會資源去「播獨」，呢個咪就係「香港眾志」口中所謂「自決」嘅真面目囉。正正因為「香港眾志」嘅主張違反《基本法》，作為立法會選舉嘅把關人，選舉主任取消呢班人嘅選舉資格可以話係天經地義。

將「暗獨」落地生根

老實講，「香港眾志」等人諸如黃之鋒、羅冠聰等人想做立法會議員想到發燒都已經唔係秘密，黃之鋒之前喺一單刑事案上求情時講到明，自己好想參選立法會，擔心判刑三個月就會失去參選資格。家陣「香港眾志」一干人等幾乎肯定失去參選資格，雖然議會裡面少咗呢班人一定係好事，但正如「香港眾志」自己所講，佢哋嚟緊會「專注民間社會」，代表佢哋會「名正言順」喺民間「播獨」，要將「自決」、「港獨」呢類歪風喺社會、社區落地生根，香港市民對於呢個情況真係不得不妨、不得不注意。

囍雨唔係「老屈」佢哋架，呢班人自己喺「轉型宣言」上面講到明會專注「反廿三條」、「反國歌法」、要香港要永遠都可以高叫「結束一黨專政」等，表面上就好似係一般反對派訴求，但查實就係要「去中國化」。呢種「去中國化」嘅論述，短期而言就係要香港青年抗拒內地，中長期嚟講，咁梗係為「民主自決」服務啦！其實呢，「香港眾志」以至之前嘅「學民思潮」成日話人洗腦，根本就係佢哋想洗人腦，煽動啲後生仔同佢哋一齊搞「自決」或者「港獨」啦；不過咁，搞「民主自決」極可能涉及暴力，「香港眾志」又會唔會同啲後生你「講清講楚」呢？！

原圖：Takungpao