近排「真普聯」召集人鄭宇碩既國籍問題引起咗坊間一陣討論，原來鄭教授早於97年已經主動放棄特區護照，轉為持有澳洲護照，成為不折不扣既澳洲人。有人就質疑，由一個澳洲人牽頭成立一個政治組織幫香港「爭普選」，道理上似乎講唔通，政治倫理上亦有唔少問題，總之就唔多妥啦！

囍雨唔係想挑剔鄭教授既國籍問題，講真，97前後，香港的確曾經出現信心危機，當時申請移民呀、拎外國居留權既人相信唔少，如果單純批評一個人持有外國護照就唔愛國，或者冇資格就香港政治問題出聲，講真又真係講唔過去既。

況且，香港法例亦真係只規定做永久居民就有權投票，有冇外國國籍？基本上係冇限制囉。

所以話，鄭教授今次單嘢最大問題並唔係在於「佢係澳洲人」，而係佢「主動放棄香港」呢個舉動。每個人面對重大抉擇、做每一個決定都有自己理由既，我唔揣測鄭教授當日點解有咁決定，但客觀效果好明顯就係令人覺得佢「放棄香港，選擇澳洲」。

作為一個政治教授、一個政界人物，鄭教授對自己國籍問題應該有敏感度吖，或者佢覺得自己只係「爭取」，而唔係「參選」，所以冇必要理會自己國籍啦；但係唔好意思都要講一句「SORRY囉」，今時今日香港人唔係咁睇架喇，你唔行出嚟搞政治，而只係做一介平民，相信都唔會有人質疑你，好似好多身處外國既僑胞咁，冇人會質疑佢哋愛國既情操架喎。

不過另一方面，一旦阿鄭教授你選擇行得政治呢條路，就唔好諗住標準同平民百姓睇齊喇，呢個道理相信唔使囍雨講，大部份人都明白既。囍雨今次冇打算係「狠插」鄭教授，畢竟因為歷史原因，好多香港人都有雙重，甚至幾重國籍；所以講到尾，囍雨都只係想大眾諗一諗：一個主動放棄香港、將自己既「根」移植去澳洲既人，大家係唔係仲要將「爭普選」既重任交託佢手上呢？呢個問題冇答案架，大家大可慢慢思考一下吖。

點都好啦，囍雨雖然想法一向都有啲偏激，不過講到普選都好認同政府既講法：落實特首普選，投票選特首既人數就可以由1200增加至500萬，點睇喺民主路上都係跨出咗一大步，作為香港既一份子，冇理想寧願推倒，都唔想普選通過既！

原圖：網絡圖片