《蘋果日報》近日明碼實價利誘讀者提供「爆相爆片」，明示暗示想讀者侵犯現任特首同三位前特首配偶嘅私隱、公然鼓勵騷擾、侵犯政敵家人嘅日常生活，手法極之「冇人性」、「冇新聞道德」。對於《蘋果日報》為針對政敵不惜利誘讀者「爆料」，囍雨喺度諗，其實提供「爆相爆片」嘅黑心讀者，當佢哋收到《蘋果日報》提供嘅利誘後，呢啲黑心錢其實都要根據香港法例去報稅，唔知《蘋果日報》有冇向稅局申報呢筆「收入」，等稅局可以向呢班黑心讀者收稅呢？

爆料如投稿 一樣要報稅

相信大家都知道，其實「爆相爆片」、投稿收稿費，甚至其他所謂嘅Freelance工作都好，嚴格嚟講其實都要報稅嘅；如果有人不時投稿去某報館，報館又畀稿費佢，咁到咗報稅季節，報館就應該提醒收到稿費嗰個人去報稅。《蘋果日報》叫人「爆相爆片」出手咁勁，作為間公司支出嘅一部份，當然有責任將「爆相爆片」人嘅報酬連同真實姓名一同報畀稅局，唔知《蘋果日報》第時會唔會咁做呢？

囍雨最喜歡講真話，的確，以一般市民而言，收到好似「爆相爆片」呢一樣嘅黑心錢，理論上就唔會走去報稅嘅。不過大家唔好忘記喎，《蘋果日報》呢份報紙成日打住「民主、自由、公義」旗號，根據佢哋自己所講，所做嘅一切都只係為「公義」而做；既然係咁，呢啲乜鬼「爆相爆片」嘅黑心項目，喺《蘋果日報》同「供料」嘅黑心讀者角度，理應都係「公義」。既然真係咁「公義」，咁好應該交稅吖，畢竟香港搞教育又要稅、扶貧又要稅、安老又要稅、起公屋都要稅，真係乜都要用到稅架，收到「爆相爆片」黑心錢嘅人要交稅，都好正確喎。

會計界梁繼昌可以「發聲」

講開稅務問題，嗰個成日自稱係稅務專家嘅盲反派會計界議員梁繼昌對呢件事唔知又點睇呢？《蘋果日報》擺到明利誘讀者「爆料」，梁繼昌作為「稅務專家」，絕對可以跟進下《蘋果日報》同佢班讀者有冇依足法例報稅喎。嗱嗱嗱，唔好搬龍門或者雙重標準呀，囍雨建議梁繼昌去信稅務局查詢，甚至正式建議，促進稅局嚴格監察住《蘋果日報》同埋班「黑心爆料人」到底有冇報稅。如果到時真係冇嘅話，睇怕梁繼昌都要大義滅親，叫稅局嚴正調查下《蘋果日報》先得喇！ 

原圖：蘋果日報網站截圖