前排油尖旺區議會通過研究取消旺角行人專用區動議（俗稱「殺街」），旺角多年來嘅噪音問題有望得到解決。「殺街」係唔係最好方案呢，社會的確有唔同意見，雖然社會多數意見認為行人專用區所製造嘅噪音已經遠遠超出當區區民可以承受嘅程度，但亦有人認為應該留番啲空間畀啲文化藝術表現者。其實無論持咩意見都好，最重要係以事論事，千萬唔好好似公民黨立法會議員譚文豪咁，搞個完全「文不對題」嘅所謂街頭實驗去將噪音問題簡單化，唔識得以民為本、只識得提「離地」建議，最終咪連自己支持者都唔撐佢囉。

規管行人區 非紙上談兵

唔知係咪因為今次「殺街」係由建制派提出嘅關係，搞到身為盲反派一員嘅譚文豪死都要出嚟唱反調。佢話喎，公民黨做咗個行人專用區嘅模擬規管活動，實測後發現音量未有超出標準。咁犀利？公民黨做咗乜嘢測試可以得出模擬規管活動後，啲表演聲唱唔超標呀？廣男一向都係實證派，即時睇睇譚文豪個做法係乜啦，原來佢劈頭第一句就話：喺遠離民居嘅旺角行人專用區（近家樂坊一帶）做試點。啊，原來前提係「遠離民居」，但而家問題正正係行人專用區班表演者喺正「民居」下面做表演嘛，而家喺非民居、非繁忙時間、搵特定人士做實驗，到底有咩參考價值？

作為一個潮人，廣男不時都會去旺角睇睇影音同攝影嘅相關產品，基本上一個月都會落旺角四次以上。大家先諗一諗，而家條行人專家區地點係邊度先？係分別位於西洋菜南街 ( 介乎亞皆老街和登打士街 )、奶路臣街 (介乎西洋菜南街和花園街 )、豉油街 (介乎西洋菜南街和花園街 )呢啲極近民居嘅地點嘛，每逢「表演時段」現場就嘈到拆天，居民生活唔安寧、商戶做唔到生意，建制派要求暫時唔好行人專用區，其實都好合理。

那是民居 不是表演場地

所謂己所不欲，勿施於人，譚文豪自己都知道要街頭表演應該盡量「遠離民居」，如果今日行人專用區地點唔係咁近居民屋企嘅話，廣男相信當區居民同油尖旺區議會都會繼續支持街頭文化藝術表演活動。係嘅，譚文豪有一點都算講得啱嘅，就係如果「規管」到就「唔一定」要「殺街」，呢點廣男都好同意，但事實係過去幾年已經證實咗現行法例應付唔到街頭表演者所製造嘅噪音，既然係咁，先畀個行人專用區停一停，還當區居民一個清靜嘅環境，咁先係上上之策。

廣男完全唔反對將街頭表演制度化，政府同立法會議員都好應該繼續就住呢方面研究同推出政策或者透過立法規管，但喺有正式嘅規管制度之前，SORRY呀，都應該係當區居民嘅民生福祉，即係基本享有寧靜生活環境嘅權利為先囉。

原圖：譚文豪Facebook