《蘋果日報》報格同採訪手法真是低處未算低。呢份一向將「新聞自由」四字視為「擋箭牌」嘅盲反派喉舌，近日唔知係因為跌紙定其他政治原因，竟然推出一個明碼實價利誘讀者提供「爆相爆片」嘅活動，仲擺到明係要針政敵嘅屋企人。公然鼓勵讀者騷擾同侵犯政敵家人嘅私生活，到底《蘋果日報》嘅管理層仲有冇人性架？將心比己，如果有人話將肥佬黎或《蘋果日報》老總嘅家人包括父母、子女，都「爆一爆」，試問佢哋又有何感想呢？

「爆相爆片」計劃和「新聞」無關

囍雨雖然唔係讀新聞出身，但長年關注香港傳媒生態，對新聞倫理都有所認識。關於《蘋果日報》呢個徵求「爆相爆片」計劃，如果只係一般徵求「爆料」，甚至係突然新聞資料或者照片的話，問題本身唔大，只要一切以「新聞性」為原則就OK；不過，一旦涉及任何針對個別人士安排及或部署，成件事就唔同講法喇！

呢呢呢，就喺5月25號之嘛，《蘋果日報》喺徵求「爆相爆片」嘅通告上面附上歷任特首配偶嘅彩色漫畫肖像，即係包括董建華太太、曾蔭權太太、梁振英太太同林鄭月娥丈夫林兆波，明顯就係想讀者針對這四個特首嘅家人；係呀，大家冇睇錯，唔係叫讀者針對歷任特首，而係利誘讀者針對政敵嘅家人呀！

前任特首家人私生活 不涉公眾利益

作為公眾人物，如果係在任嘅特首本身，由於一言一行都涉及公眾利益，公眾或者傳媒認為佢哋需要放棄部份個人私隱接受公眾監察，相信冇乜人會反對、更加唔會有人批評，但而家《蘋果日報》侵犯嘅並唔係在任特首，而係在任特首同一眾前任特首嘅家人，咁就唔同講法喇！

喺呢度，囍雨強烈要求《蘋果日報》公開交代清楚，到底叫讀者拍低呢班前任特首家人嘅「爆相爆片」，同公眾利益有乜關係？莫講話呢班前任特首嘅家人已經冇能力影響到公共政策或者公帑運用，《蘋果日報》利誘讀者喺公眾領域針對呢班前任特首嘅家人去影「爆相爆片」，客觀效果即係叫班讀者喺公眾場合、場所，公然咁滋擾呢班無辜者嘅私生活：食飯飲茶又要畀你影、行街睇戲又要畀你影、同朋友聚會又要畀你影、散步放狗都要畀你影，撫心自問，呢啲係唔係「公眾利益」？

《蘋果》比黑幫更黑心

嗱，唔好硬拗呀，拎個良心同常識去回答上述問題（如果《蘋果日報》仲有良心同常識的話）！正如前特首梁振英所講，連最歹毒嘅黑幫，都唔會針對對家嘅家人，《蘋果日報》呢種行為，除咗冇資格自稱傳媒之餘，其實係衰到連黑幫都不如。今日香港竟然有一份報格咁卑下嘅報紙，加上部份香港人竟然因為「政治」而去支持呢份報紙拎住「新聞自由」四個字去作惡，呢個仲唔係香港嘅悲哀？

原圖：蘋果日報截圖