成日聽到人話香港部份政客非常之「崇洋媚外」，凡係外國政府講嘅就一定係啱、凡係中央或者特區政府講嘅就一定錯，囍雨初頭都唔係好信，點知後來發現，班盲反派政客原來真係咁架喎！最近之嘛，美國國務院向國會提交報告，話特首林鄭月娥舊年應中央政府要求，拒絕引渡逃犯去美國，並且將呢名疑犯移交到內地。盲反派政客一聽到，即時反射式批評特區政府，仲話會擔憂打擊「一國兩制」云云，真係「唔識畀佢嚇死、識就畀佢笑死」囉！

特區政府安排合乎規定

呢個盲反派政客係邊個？咪就係今日立法會裡面資歷最深、本身又擁有律師資格嘅民主黨涂謹申囉！作為長期喺立法會保安事務委員會裡面工作嘅議員，涂謹申冇理由唔知道，香港同美國之間嘅「引渡協議」（香港唔係主權國家，所以其實只係「移交逃犯協議」），内容除咗確認香港特區屬主權國（中華人民共和國）管轄外，其他所有條文都同「一國兩制」無關！

意思就係，香港同美國雙方都可以因為「國家主權」、「安全或公共秩序」、「國家與特區之基本利益」等等理由而拒絕提供協助。換而言之，就當美國國務院所講屬實，係中央政府否決引渡個疑犯，其實完全係法治同協議內容一部份，同「一國兩制」完全冇關！當然，如果呢個決定係由特區政府自己作出，咁就更加唔可能係破壞「一國兩制」啦！

涂謹申見「美國」二字就認同

事實擺在眼前，盲反派中人，包括涂謹申之流，由始至終都對中央同特區政府有偏見，涂謹申本身係律師、又係資深立法會議員，回應美國國務院份報告前，係唔係都應該睇清楚協議同法律條文先去發表意見呢？定係因為見到「美國」兩個字就有理冇理都鬧咗中央同特區政府先，就算明知係危言聳聽都在所不惜呢？如果真係咁嘅話，咁仲唔係「崇洋媚外」？

講起「移交逃犯協議」，查實香港同內地之間係冇「移交逃犯」安排嘅，特區就講明，由於兩地法制有差異，而移交逃犯安排亦涉及非常複雜問題，所以至今仍未同內地完成商討工作。查實香港回歸祖國已經廿年，香港同內地一衣帶水，但就冇「移交逃犯」嘅安排，明顯係一個法律上嘅漏洞，既然涂謹申同盲反派咁關心「美國疑犯」嘅情況，唔知又會唔會推動特區同內地簽署相關協議呢？

原圖：Takungpao