相信唔少香港市民都試過搭飛機，應該都知道航空安全有幾重要。事實上一架飛機隨時有幾百人，航空安全當然唔可以掉以輕心啦；而關乎航空安全嘅眾多環節裡面，飛機師肯定係重中之重。老實講，如果話你知，你坐嗰班機嘅飛機師情緒極度不穩，成日都會表現得脾氣暴躁兼會不時發爛，作為乘客你仲會唔會坐呢班機？講緊嘅，咪就係公民黨「政治飛機師」譚文豪囉。

譚文豪情緒不穩玩衝擊

話譚文豪情緒不穩，並唔係信口雌黃，更加唔係人身攻擊。查實大家只要留意吓佢平時喺立法會同網上嘅言論同表現，相信大家都會認同佢係一個脾氣暴躁、唔守規矩兼經常發爛嘅人。遠嘅唔講，早排立法會審議「一地兩檢」嘅時候，譚文豪就連同幾名盲反派議員一齊搞事，包括陳志全、區諾軒等；呢班人喺議會裡面大吵大鬧，譚文豪仲一度衝出主席台指罵會議主席，表現非常狂躁。

最終，例牌菜又係勞動到立法會會議廳裡面擁有同警察相同權力嘅保安人員將譚文豪抬走，會議先至可以暢順返少少，而單睇譚文豪當日嘅表現，呢名飛機師行事無理取鬧之餘，仲一度同保安人員推推撞撞，唔講仲以為精神出咗問題。

一再試圖阻撓會議進行

其實今次已經唔係譚文豪首次嘗試衝擊會議架喇，舊年之嘛，立法會某個委員會有場閉門會議，基於議事規則嘅關係，譚文豪本人係冇份出席嘅，於是佢就聯同幾個非建制派議員，排排企喺會議室門口度嘈嘈嘈，仲一度同保安員有肢體衝撞，結果又係要勞煩保安員企晒喺門口，保護會議順利進行。

飛機師行事需要冷靜，並唔係單純因為「形象」咁簡單，而係有實際需要，始終架飛機飛到上天，隨時都可能有突發情況，要靠飛機師去判斷同應變。大家今日睇到，呢個咁嘅譚文豪，講嘢又冇道理、行為又粗暴，而且更有不止一次同立法會保安員衝突嘅紀錄，情緒咁不穩都可以做飛機師，做乘客嘅有憂慮真係一啲都唔出奇囉。

航空公司宜公布譚文豪更表

嗱，囍雨份人好公道，絕對唔會因為咁而要求聘用佢嘅航空公司「炒」咗佢，但同樣地，航空公司都要同旅客公平先得喎；不如咁啦，聘用佢嘅僱主不如就按時公布譚文豪個當值表，等旅客知道邊一班機係佢譚文豪負責駕駛，等旅客自由選擇，咁唔係最公道咩？

原圖：RTHK