《蘋果日報》吹捧參與旺角暴動嘅暴徒梁天琦，喺頭版大字標題佢「勇於承擔、不放棄香港」。先唔好講呢種評語正確與否，大家有冇發現自從梁天琦被判有罪之後，呢份報紙提都唔提早已經「放棄香港、棄保潛逃」嘅「懦夫仰」黃台仰呀？囍雨諗極都唔明，如果參與暴動而接受法律制裁係「有承擔」，咁走佬「著草」嘅「懦夫仰」即係「卸責」啦，作為反對派喉舌嘅《蘋果》，成日扮晒站喺道德高地，冇理由唔出聲批評喎！

《蘋果》扭曲讀者價值觀

今日香港，正宗妖魔鬼怪當道。除咗一眾破壞香港和平安寧環境、散播可以按個人政治喜好隨便犯法等等不良訊息嘅反對派政客外，作為喉舌傳媒嘅《蘋果》亦肯定係其中妖魔鬼怪之一。《蘋果》頭版大字標題暴動犯梁天琦「勇於承擔、不放棄香港」，講到佢好英勇咁，但查實一個人被刑事檢控，上庭接受公平審訊根本係基本責任、應有之義，褒揚梁天琦「有承擔」，本身已經係將價值觀扭曲。

或者有人會話，被告可以好似「懦夫仰」咁棄保潛逃架，梁天琦肯上庭同接受懲罰，已經係有承擔啦！錯，大錯特錯！首先，我哋唔可以因為有人做得「衰」，而認為做正常嘢嘅人係聖人。梁天琦受審，只係盡一個人、公民、市民嘅「基本」責任。「懦夫仰」棄保當然做錯，所以佢咪「懦夫」囉，就係咁簡單！

梁天琦從未承認「暴動」

第二，梁天琦真係學《蘋果》大字標題咁講，係「勇於承擔、不放棄香港」咩？喺呢度，囍雨想同大家分享返個「事實」，其實梁天琦從來冇承認過參加「暴動」！一直以來，梁天琦只係認襲警，對於罪名較重嘅「暴動罪」，係一概否認嘅；大佬，咁都叫「有承擔」？

第三，《蘋果》褒揚梁天琦接受公平審訊係「勇於承擔、不放棄香港」，最正路做法其實係同時呼籲通緝犯、已經「放棄香港」嗰個「懦夫仰」黃台仰返香港自首，如果唔係點印證到梁天琦係「不放棄香港」先？點解《蘋果》對此提都唔提呢？係一時唔記得，定係怕提出咗之後，令到讀者醒起其實班暴徒並唔係《蘋果》講得咁「偉大」同「有承擔」呢？

《蘋果》沒資格做傳媒

夠喇，《蘋果》，自從全國政協副主席梁振英就住佢哋報道梁天琦嘅手法提出質疑後，《蘋果》同佢哋個瘋狂主筆盧峯就好似突然隱形咁，唔肯直接回應「政敵」提出嘅合理疑問。做傳媒做到好似《蘋果》咁，要靠褒揚班暴動犯去擦存在感，大家話呢個係唔係香港嘅悲哀呢？

原圖：RTHK