本土民主前線前發言人梁天琦暴動罪和襲警罪罪成，偏偏個別盲反派政客竟然完無視呢班暴徒做過啲乜，係咁幫佢哋「漂白」。噚日，某盲反派組織喺金鐘舉行集會「聲援」暴徒，一班盲反派政客又衝晒出嚟抽水，其中公民黨主席梁家傑竟然話聲援「暴徒」係「應有之義」，而向來較溫和嘅工黨立法會議員張超雄，就話無論「雞蛋有幾唔啱」，都要站喺雞蛋一邊。咁講法，即係只要政治立場相近，盲反派都會認為就算係暴徒都要支持到底？咁搞法，仲有法理可言嘅？！

顛倒是非的政客

老實講，盲反派一向聲稱自己「和平、理性、非暴力」，又成日將守護法治等政治口號掛喺口邊；而家當「事件主角」變成係自己友之後，佢哋唔譴責暴力、唔守護法治不特止，仲要一個又一個咁行出嚟為「暴徒」開脫。之前李柱銘、楊岳橋等法律界人士果啲諸如「責任喺政府身上」、「尊敬梁天琦」唔講，梁家傑身為資深大律師，佢真心覺得聲援破壞法治嘅人係「應有之義」？佢唔係信誓旦旦講過類似要守護法治嘅說話咩？而家走嚟聲援「暴徒」，真係冇矛盾？

又例如，工黨張超雄一向都係較溫和嘅盲反派人士，佢平時要幫弱勢人士，大家都絕對理解嘅，但佢今次嘅「雞蛋論」，廣男實在非常之質疑；無論係「雞蛋」好，政治上較弱勢嘅人士都好，身處弱勢都唔代表可以用暴力呢？如果將張超雄一番話推到極致少少，咁「雞蛋」（本土派政客）係咪殺咗人張超雄都要企佢哋果邊呢？須知道，掟磚可能會掟死人喎，而且班暴徒唔係掟一舊，而係「磚如雨下」喎！張超雄就算要「濟弱扶傾」，都唔係咁「濟」法呀？

他們支持的人　正是破壞香港的人！

另一個問題，就係佢哋噚日嘅集會有人明目張膽咁高舉「港英旗」，其他人見到最正常嘅理解就係佢哋又借機搞「港獨」啦，咁梁家傑、張超雄等人喺呢個場合出現仲要聲援一班搞「港獨」嘅暴徒，咁係咪梁家傑同張超雄都撐「港獨」呢？佢哋到底係單純聲援暴徒？定係聲援暴徒加「港獨？還是係純粹因為有人「反政府」佢哋就要聲援呢？廣男只想提醒佢哋一句，佢哋聲援緊嘅人，正正就係破壞緊香港嘅人，佢哋「企到咁出」，好容易都畀人以為佢哋撐暴力同「港獨」架！

原圖：Takungpao