英國權威智庫Chatham House駐港高級硏究員Dr Tim Summers發表評論報告，指出白皮書無顯示北京更改對港政策，又分析問題唔在於白皮書，而係借題發揮既香港政客。報告一出，普羅大眾非常重視，一來開始明白原來有人利用白皮書炒作，另搞一套唔啱《基本法》既普選，二來對呢位Summers兄背景深感興趣，想了解一下佢係咪同中央有交情云云；畀人揭穿既泛民政客，例牌就梗係輸打贏要，話呢份報告立場「親中」，唔中立，仲屈份報告脫離香港情況添！廣男睇唔過眼，就喺呢度同大家解說一下！

先講撰寫呢份報告既Dr Tim Summers，佢係一位駐港學者嚟架，喺中大完成博士學位，而家係中大中國研究中心兼職副教授，專就中國、香港事務提供顧問意見，唔講唔知，原來佢喺香港回歸後，曾經喺英國駐港領事館工作過，對香港情況相當了解。照睇佢既PROFILE，佢既然係英國人，亦曾經為英國政府工作，點樣講都唔會係「親中」，佢寫的呢份報告，好明顯就係作為一個熟悉香港政情的駐港學者，如實地剖析佢對白皮書的理解。

英權威智庫報告不可能「親共」

仲記得泛民政客之前係咁批評白皮書內容，話顯示中央對港政策有變；到咗而家有專家指出白皮書內容無問題嘞，而係有人炒作既時候，佢哋又「九唔搭八」話報告脫離香港情況，對白皮書既內容避而不談。對泛民班政客嚟講，再冇得借題發揮，先至係最大問題！

再講Chatham House，其中一個譯名係「英國皇家戰略研究所」，顧名思義去睇，都知係一個親英國既智庫組織，同中國政府既關係沾唔上邊，而且智庫被評為世界第二，美國《外交政策》雜誌亦讃佢係美國以外排名第一既智庫，咁權威既智庫報告，大家都可以放心相信啦掛？事實上，廣男就認為，報告係無立場、無顏色，係客觀、全面、準確同中立先真！

克萊格接見陳李是政治騷

至於陳方安生同李柱銘兩位泛民老人家飛埋去英國攻擊白皮書，英國副首相克萊格接見佢哋，其實只係政治騷。克萊格係自由民主黨黨魁，同首相卡侮倫份屬唔同政黨。佢哋雖然同屬執政聯盟，但政治理念、政策執行好多時南轅北轍，克萊格近期又面臨選舉壓力，為咗爭奪話語權，無論係佢批評卡梅倫既對華政策，抑或接見陳方安生、李柱銘，好可能只係選舉導向、政治需要的一場戲。

再走落去，廣男都明架啦，報告的忠言相勸，對泛民班政客來講，都應該繼續扮睇唔到，如常自行演繹同宣揚。不過，市民眼睛永遠是雪亮的，都係交由你地自行獨立思考兼分析吧。

原圖：網絡圖片