唔使講、唔使拗，喺今時今日香港搞「港獨」嘅，肯肯定唔係乜嘢「義士」。「港獨」無論係國家憲法、《基本法》，甚至國際法層面都不受認可，呢個論點之前已經好多人講過，囍雨喺度亦唔重複；而事實上，「港獨」喺道德層面其實亦唔理，喺今日香港嘅現實環境下，搞「港獨」代表暴力、流血，甚至係無差別殺人式嘅恐怖襲擊，試問喺呢種情況下，推動「港獨」、支持「港獨」、宣揚「港獨」嘅暴徒，又點可能係「義士」？

反對派設法為暴徒漂白

查實囍雨都真係唔想成日咁激動，偶爾亦想「佛系」一下，任得班反對派群魔亂舞咪算囉，但每次睇到香港班反對派嘅歪理，有時真係佛都有火。好似嗰個旺角暴動「參與者」梁天琦咁，擺明就係不折不扣搞「港獨」嘅暴徒，但香港班反對派同喉舌傳媒硬係要捩橫折曲、扭盡六壬幫佢「漂白」，部份「傳媒泛民」仲夠膽死稱佢為「乖仔」、「義士」、「值得尊重」，你話係唔係睇到眼火爆吖！

香港競爭力一點不差

點解話搞「港獨」喺道德層面同樣站唔住腳呢？首先，今日香港作為中華人民共和國一部份，整體環境其實一啲都唔差，個別範疇嘅排名更加係世界其他經濟體望塵莫及。以競爭力為例，瑞士洛桑學院最近發表嘅「世界競爭力年報」，就將香港嘅競爭力列為全球第二，其中喺「政府效率」同「營商效率」方面，香港更加係連續四年排名世界第一；至於表現最差嘅係「基礎建設」，排名世界23位。

睇到呢度，囍雨只係想問一句，今日香港到底係邊班人阻住香港進行各項「基礎建設」？係中央政府、特區政府，定係反對派？班搞「港獨」嘅人長期聲稱「香港沉淪」，所以佢哋要「自救」搞「港獨」，大家覺唔覺得超好笑呀？

香港法治 亞洲第一

好，唔講經濟、唔講競爭力，我哋又睇睇香港反對派成日話「法治已死」，到底真相又係點。事實係，香港過去二十年，喺世界銀行調查中，香港嘅「法治指數」都係排喺世界頭十五名；而「司法獨立」方面，香港更加排喺亞洲第一，比日本、南韓、菲律賓呢啲所謂西方式民主國家更加優秀！

記住喎，香港上述嘅成績，係以「中華人民共和國香港特別行政區」嘅身份獲得，回歸後中央政府畀咗幾多支持香港唔在講，國家本身嘅經濟同科技發展更加係愈來愈強勁，香港能夠背靠呢個世界第二大經濟體，早已經令到其他競爭對手「非常葡萄」，試問喺呢個情況下搞「港獨」，暴徒們點可能係「義士」？

「港獨份子」是暴徒非義士

正同文章劈頭所講，搞「港獨」代表暴力、流血，甚至係無差別殺人式嘅恐怖襲擊，暴徒梁天琦等人不問是非咁推大量年輕人去死、去流血，目的只係為咗滿足自己嘅政治私慾，反對派為咗反政府、反中央，竟然埋沒良心不斷為「港獨」份子漂白，稱呢班人做「義士」，到底佢哋知唔知個「醜」字點寫？如果佢哋仲有一點做人嘅「良知」，請佢哋唔好再指鹿為馬啦！

原圖：資料圖片、Takungpao