參與旺角暴動兼襲警嘅暴徒梁天琦，日前暫時打甩咗條煽惑暴動罪，不過由於佢其中一條暴動罪罪成，正等候法院判刑，加上律政司甚有機會就住另一條陪審團得唔出結論嘅暴動罪上訴，所以囍雨暫時亦唔談論咁多，喺度反而想集中講吓已經棄保潛逃好幾個月、之前曾經非常威威咁宣稱「寧為玉碎，不作瓦全」嗰個黃台仰，到底呢個講就天下無敵，做就無能為力嘅「準暴徒」幾時先返香港伏法呢？

懦夫仰「著草」有前科

過咗兩年，今日都係時候同黃台仰算一算舊帳。大家如果唔健忘的話，應該記得今次其實唔係黃台仰呢名懦夫第一次玩失蹤，當日旺角暴動之後，懦夫仰就一度失蹤十日，最終喺天水圍天晴邨一個單位被警方拘捕；當日，警方同時喺佢匿藏個單位裡面搵到違禁武器、壯陽藥「偉哥」同埋53萬元現金等。

間屋裡面搜到乜，囍雨唔敢入懦夫仰數，因為屋主已經攬晒上身，要告嘅亦都已經告咗；至於嗰幾十萬現金，懦夫仰就曾經聲稱係「港獨」組織本土民主前線嘅資金。剩係睇呢個組織水源充足、懦夫仰本身就已經有「著草」前科，點解當日法院仲會容許佢喺正式受審前可以離境呢？呢一點，係囍雨一直都諗唔明嘅。

人哋做「玉碎」 自己嘆世界？

囍雨真係唔知道，當日跟住懦夫仰去衝去推去撞嗰班人，今日有咩諗法，尤其係被捕同埋被判暴動罪成嗰一班，到底佢哋有冇後悔過跟咗呢個咁嘅懦夫仰去做愚蠢嗁事，而搞到自己一生前途從此毀呢？被判暴動罪罪成、坐監幾年都未算最慘，最慘係有一個香港少女，為咗「走數」逃避審訊，竟然公布自己走咗去台灣，話受到「台獨」份子保護喎。

冇架喇，呢個女仔就咁一世，呢一世都唔使旨意堂堂正正咁返去自己真正嘅屋企；一生都擔驚受怕，又要驚台灣警方捉到佢再驅逐出境，又要離鄉別井同家人分隔兩地，真係諗起都心酸。呢一切嘅始作俑者係邊個？懦夫仰肯肯定係其中之一囉！做咩呀，又話「寧為玉碎，不作瓦全」嘅？原來只係推人去死、叫人去做「玉碎」，自己就匿喺外國，大模廝樣嘆世界呀？

懦夫仰毫無廉恥 拋低同伴置身事外

懦夫仰，你走唔甩架喇，你如果真係選擇匿，咁你即係決定匿一世，呢一生人都再抬唔起頭做人。望住一班錯誤跟隨你嘅人相繼入獄、你個好兄弟梁天琦亦暴動罪罪成，旺角暴動當晚企喺客貨車上面用擴音器發出挑撥言論嘅你，真係連少少做人尊嚴都冇，唔肯返嚟承擔罪責？香港人認住喇，呢個就係所謂「本土派」嘅真面目喇！

原圖：Takungpao