喺香港呢個擁抱法治精神嘅國際都會，近年出現咗一班非常稀奇古怪嘅政客，佢哋「起家」時聲稱自己參政嘅理念係要守護香港嘅法治，但到咗「關鍵時刻」，往往係佢哋帶頭破壞法治，最經典嘅例子莫過於港大法律學者戴耀廷帶頭搞違法佔領。近日，囍雨見到公民黨立法會議員楊岳橋撰文講因為旺角暴動被定罪嘅梁天琦，仲聲稱「初一那夜，將來也許只佔教科書裡的一頁；對於數十位年輕香港人，卻是一場失望與憤怒而起的終生回憶」，囍雨真係好懷疑，楊岳橋「講呢啲」，到底係咪曲線撐旺角暴動呢？

為何不譴責暴力？

綜觀楊岳橋文章嘅上文下理，大約都係表達對梁天琦嘅尊敬同讚嘆，嗱，如果楊岳橋只係話梁天琦願意面對法律程序，咁囍雨覺得係無咩問題嘅；但問題就在於，佢提到旺角暴動一事嘅時候剩係話「一場失望與憤怒而起的終生回憶」，隻字不提果晚發生咩事，大家真係要問下楊岳橋，乜失望就可以打人架喇？憤怒就可以掟磚架喇？楊岳橋既然要講件事，點解剩係話班暴動被告「失望、憤怒」，又唔講下佢哋做過啲乜呢？

楊岳橋篇文章「遮遮掩掩」，意有所指咁美化梁天琦以至其他旺角暴動參與者，但佢作為大律師，難道佢唔知道就算有咩政治訴求都好，都唔應該用暴力表達訴求？如果個個因為失望、憤怒就胡作非為，法治社會又喺咪會變成動盪社會呢？仲有，佢文章話梁天琦「大可選擇關掉手機留在他鄉，但，他選擇承擔選擇回來香港選擇面對自己與法律」，言下之意，即係犯咗事只要唔「著草」就要讚好？楊岳橋如果認為呢班被告咁值得尊敬，佢自己又唔「落場」衝擊、暴動下？梗係唔會啦，因為佢為咗自己議席、律師資格，佢最多只會讚賞啲人去衝、去犯法，叫佢參與埋一份佢一定Say No！

留案底令人生更「精彩」

講到呢度，又令囍雨想起反新界東北案判刑果時，楊岳橋講過「今次入獄的13人都因為案底而令人生變得更精彩」；盲反派大狀最犀利嘅地方，係在於佢哋永遠都唔會自己去衝擊、打人，而係不斷喺背後推波助瀾，喺人「衰咗」之後就發下帖、抽下水扮「同路人」，既唔駛承擔罪責，又有Credit，真係Why Not？

原圖：RTHK