外界非常關注嘅旺角暴動案，今日終於有裁決，被告煽惑暴動、暴動罪嘅本土民主前線梁天琦雖然無被告入煽惑暴動罪，但連同佢自己之前承認嘅襲警罪，佢最後都法網難逃，另有一項暴動罪罪成（仲有另一條暴動罪未達有效裁決）。廣男就覺得，今次法庭裁決正好證明，無論政客們有咩理由、理想有幾崇高都好，都可以用暴力宣洩不滿，當警察係「出氣袋」；而對於有說法指梁天琦係「義士」，廣男必須強調，梁天琦係罪犯，唔係咩「義士」！

梁天琦是暴力犯！

喺旺角暴動案發生後，廣男喺網上見到好多言論，有啲人話梁天琦係英雄，有啲人話梁天琦夠勇武。今日廣男上網，見到「港獨」組織「學生動源」話「天佑義士 天佑天琦」，廣男真係想同呢班「港獨」派斟酌下，當一班人為咗表達政治訴求，不惜暴力對待警察，請問佢哋「義」喺邊？話梁天琦英雄，佢又「英」喺邊呢？

睇番新聞報道，梁天琦喺旺角暴動當晚先向警員掟樽，再用腳踢向警員，之後仲要用木製卡板打向警員背部，該名警員畀人打到周身傷，仲要少少「永久傷殘」！有啲常識嘅人都會知道，就算平時行街見到人用卡板運貨，對腳係咁易撞到塊卡板都會好痛，而家梁天琦成塊卡板「車」去警員度，如果「車」中個頭，分分鐘會搞出人命，一班激進人士話梁天琦係英雄、「義士」，係咪即係鼓勵暴動，用暴力解決問題呢？

理念多崇高　行動也要守法

今次梁天琦被判暴動罪成，案件正好告訴大眾，無論任何人包括激進政客有咩政治訴求都好，都唔應該訴諸於暴力，而襲警更加係唔能夠接受，引用一句英文就係「The end doesn’t justify the means」，即係就算目標有幾崇高，都唔代表所使用嘅手段（例如違法、傷害到他人）係啱嘅。以後，如果有政客叫啲大家上街、用暴力，大家真係要深思，表達意見係咪要用暴力；亦要諗下為咗一時洩憤，既令他人受傷，又斷送自己一生前程，係咪真係值得。

原圖：Takungpao