喺立法會強搶女EO手機、毁壞他人物品兼「窺私」嘅民主黨議員許智峯，疑似因為早前被警方正式拘捕而非常「沉默」。當大家以為許智峯會「摺埋自己」嘅時候，擁有強大盲反、激進因子嘅許智峯，噚日喺立法會突然又嚟料，喺本來應該討論「譴責鄭松泰」嘅議案嘅時候（可惜議案到最後都係通過唔到），突然動議「緊急」辯論香港記者喺北京疑似被襲一事。先唔理許智峯呢個動議合唔合理，如果佢係咁重視「反暴力」的話，早排又做乜去搶人嘢，仲要搞到畀人告普通襲擊呢？為正義？唔覺囉！

許智峯好緊張「暴力」？

喺立法會就嚟要傾譴責鄭松泰嘅「關鍵時刻」，許智峯突然提出要緊急辯論，梁君彥拒絕，然後許智峯就話梁君彥決定「荒謬」、「感到遺憾」；照許智峯嘅反應，佢似乎好緊張一啲發生喺香港人身上嘅暴力事件咁，但佢自己公然喺立法會「搶嘢」、「懷疑襲擊」，佢自己事後連自己「搶嘢」都唔肯認，只係話自己「攞咗」、「取去」女EO手機，想輕輕帶過事件甚至係方便將來「逃避罪責」。如果話許智峯真係咁「反暴力」，囍雨個人認為係說服力不足囉！

老實講，無論許智峯承唔承認，或者佢自己心底係咪咁諗都好，佢喺呢個時候提出動議要緊急辯論，客觀效果就係幫可能因為「倒插國旗區旗」被譴責甚至失去議席嘅鄭松泰「拉布」。囍雨睇件事非常簡單，就係盲反派入面尤其係激進派，就算鄭松泰被法庭判埋有罪都好，佢哋都要包庇鄭松泰。

嫌疑犯包庇定罪犯

不過，今次盲反派由許智峯出手拖延議會進度，確實係非常之尷尬，因為許智峯作為有案在身嘅「嫌疑犯」，去動議講暴力已經無說服力，佢提動議嘅客觀效果仲要係為一個「定罪犯」拉布，咁咪即係「嫌疑犯包庇定罪犯」，盲反派齊齊圍威喂，唔理自己人做錯乜都好，都要包庇到底？Come On，你哋平時啲正義去晒邊呀？ 

原圖：RTHK