「違法佔領」發起人戴耀廷前排去台灣出席「五獨」論壇，期間發表「港獨」言論，話香港「可以考慮」成為「獨立國家」，言論一出，即時受盡各方抨擊和同唾棄。正因為咁，立法法會議員何君堯今日就向政府提出質詢，問政府做乜到而家都未就戴耀廷嘅「港獨」言論採取法律行動，教育局局長楊潤雄就重申港府反「港獨」立場，指特區有責任維護國家發展利益，若然涉及刑事罪行，執法部門會依法處理。廣男認為，再問學校或者教育部門點處理戴耀廷真係冇乜意思，大家認真諗諗，而家擺明有人「公然搞港獨」，明明有可能係違反刑事罪行，仲乜要交返大學處理「放生」佢先？

不能再讓戴耀廷「播獨」！

「港獨」歪風由幾年前開始到今日喺唔同大學「遍地開花」，廣男真心覺得靠學校警告下啲師生，又或者拆除啲「港獨」宣傳品，完全無助於解決「港獨」問題。正如何君堯所言，執法部門係咪要研究戴耀廷嘅言論到底有冇觸犯任何刑事罪行，其實一早有人講過，《刑事罪行條例》第9條中係有涉及「煽動叛亂」嘅罪行，法律一早已經喺度，絕對唔係為今日任何人度身訂造，即使動用亦完全唔係「所謂打壓」囉。

老實講，如果喺呢個階段唔做多啲嘢去Stop「港獨」言行，事態再發展落去，就未必係有人講「港獨」或者喺學校掛下貼下「港獨」宣傳品，而係好似「旺角暴動」咁付諸行動，用武力爭取冇可能發生嘅「香港獨立」；冇錯，到時警方係可以做嘢拉人，但如果等到有不幸事件或者暴力衝突發生執法部門先可以做嘢，咁係咪太遲呢？

先法辦戴耀廷？

廣男記得戴耀廷曾經講過，佢不斷畀人批評係因為政府以至其他單位要「殺雞儆猴」，廣男就希望如果有一日執法部門要嚴肅處理「港獨」問題，可以承戴耀廷貴言，先拘捕、起訴佢呢個最新冒起嘅「獨派」代表人物。戴耀廷作為「違法達義」發起人，如果社會見到佢啲政棍受到法律制裁，或多或少都會起到警剔作用嘅。

原圖：文匯報（取自大公報）