盲反派議員喺議會搞事，基本上都唔係咩新聞嚟架喇，不過近日有單新聞，就令囍雨覺得盲反派非常之可恥，事關早前立法會一個委員會審議緊高鐵「一地兩檢」方案嘅時候，委員會主席將鬧事嘅區諾軒、陳志全逐出會議室，毛孟靜就上前阻撓保安工作，據報仲有保安受傷。事後行管會發信譴責一干涉事議員（包括在另一會議鬧事嘅范國威），但毛孟靜竟然仲話「點解唔係話保安阻礙我哋執行職務」。咁講法，毛孟靜係咪即係話佢哋嘅「職務」就係搞事呢？

存心擾亂議會秩序

先講番件事，無論係高鐵「一地兩檢」方案，抑或《國歌法》立法嘅公聽會都好，盲反派根本就唔係想議事，而係想用盡一切方法阻礙會議進行，最好就係搞到「流會」令自己「拉布」成功；喺呢班盲反派一心要推倒會議，進行衝擊或者鬧事嘅情況下，保安收到委員會主席命令要將呢班政棍逐出會議廳，其實係迫不得已。同埋一班盲反派唔好忘記，根據《立法會(權力及特權)條例》，立法會人員（包括保安）喺會議廳範圍具有警務人員嘅權力，保安協助委員會主席維持秩序，可以話係應有之義！

自己搞事 諉過於保安

可恨嘅係，呢班政棍搞完事仲要瀨死唔走，甚至令到有保安喺過程中受傷；誠如立法會主席梁君彥所言，立法會行管會有責任提供安全嘅工作環境畀同事，而根據《立法會(權力及特權)條例》，有人妨礙正在執行職務嘅立法會人員係犯法嘅，盲反派如果再亂嚟，其實行管會係可以報警嘅！或者毛孟靜覺得自己係議員所以大晒，但事情唔係佢哋「執行職務」畀保安阻住，而係佢哋阻住會議而保安執行職務，佢哋搞事仲想屈番啲保安轉頭，實在過份！

究竟有冇將保安當係人？

其實保安都係人，又唔係沙包，盲反派要搞政治「大龍鳳」，下下搵佢哋出氣、做磨心，搞到人身同心都傷晒，真係好無人性囉！囍雨覺得同呢班盲反派「太客氣」，有時可能會害到自己，如果班政棍妨礙保安人員執行職務，過程中甚至有保安受傷，囍雨強烈建議立法會秘書處或者行管會報警處理，等執法部門、司法機構判斷到底係保安阻住議員做嘢，定係議員搞事仲要傷到啲保安。盲反派班人向來「錫身」（一涉及刑事案件就可能會影響議席，盲反派表面勇武，實則議席要緊），如果佢哋真係被捕而有可能要負上刑責，囍雨包保佢哋唔敢再亂嚟。

原圖：Takungpao