社民連主席吳文遠前年到廉政公署舉報民政局常秘馮程淑儀「涉嫌貪污」，之後再向傳媒同喺社交媒體披露廉署「已經立案」調查馮程淑儀，結果被起訴兼裁定犯下三項「披露受調查人身份」等罪名，要還押候判。吳文遠被法官批評「為做SHOW而爆料」，入獄不能避免，呢單案亦令囍雨諗起民主黨立法會議員林卓廷呢個成日「爆廉署料」搏出位嘅「政治騙徒」，今日吳文遠被判罪成，林卓廷又點可能置身事外呢？

林卓廷借「爆料」上位

如果大家有留意新聞，應該會留意到林卓廷成日以「前廉署調查人員」身份爆料，好似個廉署「民間發言人」咁；但參照返「吳文遠案」，囍雨極度懷疑林卓廷已經犯咗法，而且極有可能係需要即時收監嗰一種。呢呢呢，就係2014年之嘛，嗰單係「違法佔領」期間被爆出嚟嘅所謂「UGL事件」呢，當時仲未係立法會議員嘅林卓廷，以市民身份向廉署舉報時任特首梁振英「涉貪」，而作為「投訴人」，亦的確有公開講過「梁振英正受調查」，疑似想未審先判、營造梁振英真係有罪咁款，如果套用返今日吳文遠案嘅準則，林卓廷可以話係犯罪嫌疑極大。

披露廉署事情 林卓廷可能已犯法

囍雨唔係亂講，大家只要隨手「Google」一下，好容易就見到林卓廷喺2016年7月就曾經喺《生果報》撰文，話「梁振英作為UGL案的被調查人士」、「相信梁振英不會是最後一位特首遭廉署調查」等等，白紙黑字冇花冇假，除非林卓廷話《生果報》老屈，否則算唔算披露咗廉署正調查事件，因而犯咗法呢？另一個問題，就係曾經有報道話廉署中止調查梁振英嘅時候，廉署「民間發言人」林卓廷又公開話佢作為UGL事件嘅「投訴人」，佢未收到廉署通知話終止調查。佢咁樣公開講一講，係咪即係佢又「爆」咗廉署啲嘢出嚟呢？

真係上，前副廉政專員郭文緯就曾經分析過，法例寫明要保密被投訴人身份或者調查細節，如果有人透露有關資料，即屬違法，而要對正調查案件內容保密嘅理由，一來唔想被查者毀滅證據或者畏罪潛逃，而另一方面亦係要保護受查者嘅名譽，因為喺香港，任何人未定罪，都唔應該被假定違咗法，更加唔應該畀人戴住有色眼鏡看等！

一視同仁 就應該起訴林卓廷

講到呢度，廉署係咪應該跟進同交代一下，到底呢個成日借廉署過橋搞個人政治宣傳嘅林卓廷，佢嘅種種行為有冇犯法呢？囍雨對廉政公署一向好有信心，相信佢哋執法一定一視同仁，亦都相信廉政為咗保住「廉署保密，密密實實」呢個金漆招牌，絕對唔會徇私枉法，否則以後仲點會有人信向廉署投訴，一切內容會絕對保密喎。喺度，囍雨借用林卓廷「天下為公」天仙局嘅一句話，「香港人，告林卓廷！」  

原圖：RTHK