「敵人嘅敵人就係朋友」呢句說話大家聽得多，現實嚟講雖然應驗機會唔算好高，但生活之中總會搵到例子。最近，熱血公民立法會議員鄭松泰因為倒插國旗、區旗面臨被DQ，如果有幾個盲反派議員投票支持譴責佢或者冇出席會議，佢個議席都危危乎。所以聞到燶味嘅鄭松泰就去信全體議員叫佢哋「保護選民嘅政治權利」，明眼人都知佢對象係班盲反派啦。嗱，本來幫自己「拉票」就冇乜問題嘅，但鄭松泰之前鬧盲反派鬧得好兇狠架喎，而家向「敵人」求救咁有趣？

鄭松泰以狙擊盲反派「起家」

老實講，無論係建制派抑或盲反派議員，要為同自己相關嘅議案「拉票」，本來就係人之常情。不過，鄭松泰向其他盲反派「拉票」（囍雨暫且唔用「乞票」呢個講法），其實就有啲肉酸喇；大家記得嘛，其實熱血公民以至鄭松泰本人都好，佢哋係咪靠鬧政府、建制派「起家」呢？都係嘅，但佢哋最為人知嘅、令自己別樹一格嘅言行，其實就係靠不斷鬧同狙擊傳統嘅盲反派人士，借此吸引激進支持者；而家鄭松泰向「敵人」拉票，可能真係有啲衰仔喎！

隨便舉兩個例子，2014年6月，即係臨近支聯會搞六四集會嘅日子，鄭松泰就公開話支聯會搞六四晚會係將香港民主發展同力量引導向錯誤方向，仲話過往政改方案同關鍵議題，「都畀班偽民主派出賣」；另一個例子，就係2015年區議會選舉，鄭松泰派人去選何俊仁參選嘅選區，仲要落區派發「何俊仁賣港實錄」，批評何俊仁同民主黨種種言行。驟眼睇落去，鄭松泰真係好似同傳統盲反派有深仇大恨咁，比著係囍雨，就未必會向「敵人」拉票喇，不過鄭松泰可能基於議席嘅考量，唯有「扮下矮仔」；又或者，佢覺得盲反派同樣作為建制派嘅敵人，咁盲反派呢個「敵人嘅敵人」，又變咗佢做朋友，所以佢都唔怕「厚住面皮去拉票」啦。

盲反派始終會護短

咁盲反派最終會唔會出席同埋對譴責議案投反對票，以支持鄭松泰繼續留喺議會呢？囍雨覺得盲反派絕對會咁做，因為第一盲反派向來對人不對事，鄭松泰點講都係反建制份子，佢哋無理由唔支持；第二就係盲反派始終唔想反政府陣營喺立法會少咗一席。不過凡事皆有因果，囍雨反而想知如果今次盲反派救咗鄭松泰，鄭松泰到下次選舉仲會唔會借批評盲反派搶激進選票，實行玩「恩將仇報」呢？大家食住花生等睇戲啦！

原圖：Takungpao