近年因為粵港澳大灣區成為國策，好多人都開始討論大灣區嘅願景同發展。早前，就有人認為大灣區嘅大有作為，香港人有可能第時會自稱為「大灣區」，明明係一番出於善意嘅表態，但就畀個別媒體追住嚟「咬」。今日，囍雨睇報紙，甚至見到《生果報》話講出有關說話嘅蔡冠深先生係「出賣香港嘅茅賊」，擺明玩人身攻擊，囍雨又想講，如果要講「賣港賊」，會唔會《生果報》似係多啲呢？

《生果報》又斷章取義

囍雨講緊嘅，係今日喺《生果報》一篇題為《港人變「大灣區人」的噩夢》、由佢哋主筆盧峯所撰寫嘅社評文章，入面盧峯為咗批評政見唔同嘅蔡冠深，竟然話蔡冠深「為了討好北大人而罔顧香港根本利益，是活脱脱出賣香港的茅賊」，撇除盧峯點樣斷章取義唔講，佢而家係咪玩人身攻擊先？

講真，社會各界討論社會問題，發表自己意見完全冇問題，如果其他人例如盲反派、《生果報》唔同意，可以理性發表意見，但一開口就鬧人「賣港賊」，囍雨要問下盧峯，蔡冠深有冇講過香港要放棄「一國兩制」、「港人治港」先？蔡冠深嘅意思，係想港人把握機遇，定係「賣咗香港」先？如果因為一句「大灣區人」就叫「賣港」，咁唔通《生果報》唔叫自己中國人，囍雨又可以話佢搞「港獨」喇喎？

誰損害香港的長遠利益？

盧峯話人「損害香港長遠利益」，囍雨又想同盧峯斟酌下，《生果報》成日幫啲搞「違法達義」嘅人做「免費宣傳」，最近民主黨立法會議員許智峯做「強盜」都要調番轉出文屈政府派人到立法會「嘥公帑」，要講「損害香港長遠利益」，真係「捨《生果報》其誰」？盧峯而家仲好意思話番人轉頭？會唔會係盧峯為咗拍集團老闆馬屁，所以要全力抹黑大灣區？如果唔係咁，盧峯又駛咁用力去抹黑人！

老實講，香港作為理性多元嘅社會，有唔同意見互相討論絕對冇問題，但囍雨極度唔鍾意玩「老屈」、人身攻擊嘅手段。如果一言不合就話人係「乜賊」、「物賊」，咁《生果報》自己畀人話係「漢奸」、「賣港賊」果時，大家係咪又要同情地理解批評《生果報》嘅人呢？所謂己所不欲，勿施於人，如果一個媒體發展到一個地步要靠人身攻擊呢啲「出位」言論嚟吸引注意，大家話幾「陰公豬」呢？ 

原圖：Takungpao