被嘲諷為「偷呃拐騙」黨嘅民主黨，自從佢哋個立法會議員許智峯喺立法會公然搶女EO手機同偷睇人手機私隱後，成個黨都可謂醜態百出。既有許智峯本人不情不願甚至「攻訐」番受害者嘅「道歉」之後，又有黨主席胡志偉為咗保位議席喪搬龍門，由開頭譴責、紀律調查許智峯，到最近就話覺得許智峯未至於要被DQ。今日，囍雨睇新聞，見到民主黨元老級人馬、資深大律師李柱銘都出口喇，話應該「公平對待許智峯周浩鼎何君堯」；囍雨真係非常懷疑，到底李柱銘係唔知許智峯案嘅嚴重性，定係佢覺得許智峯「斷正」冇得幫，為咗政治理由點都要拉其他人落水呢？

許智峯案性質嚴重

當李柱銘將許智峯「搶劫」案同周浩鼎、何君堯等人拉埋一齊嚟講，囍雨首先要問一句，呢啲事件係咪可以直接類比先，例如周浩鼎聽左梁振英意見，事實係想擴大有關UGL委員會嘅調查範圍，先唔講佢哋咁做係唔係絕對正確，李柱銘作為資深大律師竟然覺得涉嫌犯下幾單刑事罪行、仲要自己同埋個黨都要一齊出嚟認錯、道歉嘅許智峯案，可以同呢啲事件類比？李柱銘似係發揮佢嘅大狀本色，「曲線」支持許智峯多啲喎！

老實講，李柱銘作為香港資深大律師名冊裡面排第一嘅大狀，佢會唔知道許智峯事件有幾嚴重？會唔知道許智峯嘅行為在法、在情、在理都係「超錯」？囍雨唔係好信囉！唯一合理解釋，就係李柱銘以至其他盲反派政客甚至媒體都知道許智峯係「好難救」嘅，所以只好將其他人士拉埋嚟講，簡單而言就係「轉移視線」。喺呢度囍雨反而要問番李柱銘佢哋，你哋平時唔係好「正義」嘅咩，乜而家許智峯「搶嘢」又可以「輕輕帶過」喇？

盲反派為護短 去到盡

綜觀盲反派近日嘅言行，就係為咗護短，可以話去到盡、乜都講得出口，有人話許智峯唔涉及誠信問題，有人話佢做嘅嘢冇損害公眾利益，有人話佢罪不致死，甚至有人許智峯根本無罪，係個政府人員唔啱先真。無論盲反派講咩都好，囍雨想同李柱銘講句，你唔只係一個普通嘅政客，而係一個喺法律界都好有地位嘅大狀，如果你為咗偏袒許智峯不惜連自己專業判斷都唔理，甚至攻訐埋政府、執法部門，其實你算唔算係破壞埋香港嘅法治呢？調番轉講，如果係建制派人士搶嘢，我諗李柱銘應該會化身做「正義超人」喇！

原圖：大公報