期因為黨員許智峯喺立法會公然「搶劫」、涉嫌違反四條刑事罪行而出晒位嘅民主黨，喺沉重公眾壓力之下，依然要繼續搞個擺明係天仙局嘅所謂「天下為公」出嚟，試圖借人格謀殺前特首梁振英嚟幫自己已經江河日下嘅「偷呃拐騙」黨挽回頽勢。不過，民主黨林卓廷等人似乎剩係識炒作，不斷叫被誹謗嘅梁振英自證清白，完全無視當事人叫佢哋收回虛假指控，繼續裝聾扮啞日日抽政治油水。今日，梁振英又再公開回應林卓廷，批評林卓廷改口、明知故犯，囍雨真係好想知道林卓廷係咪要繼續「扮唔知」，繼續老屈梁振英呢？

改口死兜 繼續老屈梁振英

之前林卓廷喺一個公開場合，曾經講過梁振英喺同UGL簽訂協議嘅時候仲係戴德梁行董事，不過收到梁振英封律師信之後，就改口話梁振英「收到文本」果時仲係董事，似乎佢都知道自己講錯嘢、屈錯人，不過基於盲反派死唔認錯嘅本色，佢都堅持話梁振英未能解說利益衝突嘅問題，但實情係點呢？

根據梁振英畀林卓廷呢班政棍嘅律師信，其實當中第15至18段已經寫明，梁振英喺戴德梁行辭職前其實係拒絕同UGL洽談離職協議嘅，而UGL亦請求戴德梁行主席同皇家蘇格蘭銀行協助聯絡梁振英，呢啲林卓廷會唔會唔知？就當佢真係唔知，收到律師信後見到自己錯晒，道理上、人情上係唔係都應該向當事人公開道歉呢？可惜，林卓廷竟然連基本人格都冇，明明「屈」錯咗梁振英，但就拒絕認錯，一味「死撐」梁振英喺UGL事件上面仍然有利益衝突。一味係咁兜、繼續屈，呢個咪民主黨真面目囉。

老千局之「謎」未解

查實除咗林卓廷，民主黨另一個主力搞「天下為公」嘅立法會議員尹兆堅同樣衰到貼地，對於梁振英嘅回應同反駁，呢名「尊貴嘅立法會議員」竟然只係話「唔會花時間同梁振英做筆友」，自以為回應好幽默，查實就好無賴。一個係咁、兩個又係咁，呢個好可能就係今日民主黨嘅寫照。

話時話，講開UGL事件，可能公眾都聚焦喺林卓廷等人嘅語言偽術身上，但囍雨喺度又要recap一下、提下大家，民主黨籌咗過200萬港元，文件寫明何俊仁間律師事務所係Partner，何俊仁本人又講明如果再提供服務要收錢，大家真係要睇清楚民主黨最後係咪掠市民水畀自己友何俊仁賺。如果事情屬實的話，除咗證明何俊仁佢哋好等錢駛之外，大家亦都可以睇穿民主黨一邊做政治騷、一邊呃市民錢嘅「一石二料」之計！

原圖：Takungpao