特首梁振英尋日啟動政改五部曲既第一步，雖然仲有漫漫長路，但至少叫做行咗第一步吖。

問心一句，囍雨對可唔可以成功通過政改都唔係咁樂觀；鬼咩，成個泛民畀激進派同學民思潮牽住鼻子走，死都要有擺到明違反《基本法》既「公民提名」先收貨，政改前景點會樂觀吖。

講返尋日份政改諮詢報告，報告出左之後，社會反應總算正面，皆因份報告乜意見都收晒入去，完全冇隱瞞之處。

雖然政府如實反映，但偏偏某啲泛民中人硬要雞蛋裡面挑骨頭，好似話政府只係肯「質化描述」蒐集到既意見，而無「無量化分析」喎。

囍雨真心想問一句，到底大家有冇睇過份報告架？嗱，不如大家睇清楚份報告既「附錄四」先啦！

「附錄四」清楚交代晒所有政改相關既民調，海納百川，清清楚楚，一查就查到。而最諷刺既係，呢份附錄裡面，印住既第一個民調，正正係《明報》委託港大民意研究計劃做既，條問題係︰「就2017行政長官選舉方面，有意見認為應該先由提名委員會揀選，確保所有特首候選人都唔會對抗中央政府，最後由市民一人一選出行政長官。你有幾支持或者反對呢個方案呢？」

調查結果，「支持」既達到49%咁多，至於反對既只有32%囉。嘩！49%市民贊成有「篩選」喎！49%市民贊成唔應該有同中央政府對抗既候選人喎！唔知呢啲數據夠唔夠「量化分析」呢？定係喺泛民心目中，只有充滿水份既70 萬「公投」同51萬（實則只有17萬）遊行先叫「量化分析」呢？

泛民主派，你哋會唔會接受這個「量化分析」結果呀？定係選擇性失明，繼續雙重標準，唔肯面對現實先？

原圖：bastillepost