近期社會熱話除咗一啲令人「透唔過氣」嘅政治新聞之外，廣男相信好多人尤其係後生仔都會討論下《復仇者聯盟3》，電影入面一班超級英雄雖然平時都好強橫下，但都係都係不敵「越嚟越多」寶石嘅魁隆（據報只要魁隆攞埋薛家燕頭上面果粒「寶石」就不得了 … 笑），戲入面奇異博士喺畀咗粒寶石魁隆之後講過真正嘅決勝而家先開始，就令廣男諗起噚日有關高鐵「一地兩檢」嘅議案。當大家以為議案喺委員會通過咗就會順利？錯喇，真正嘅戰場係喺立法會大會先真！

另類方式「拉布」

雖然立法會大會之前已經通過咗修改《議事規則》，但廣男唔覺得高鐵「一地兩檢」方案會「好順利」咁喺大會通過；大家噚日其實都有眼見啦，盲反派「無布可拉」，就一定會玩衝擊，呢個衝完都第二個接力衝，拖延一秒得一秒。可以預見得到，當議案喺大會審議嘅時候，盲反派一定會繼續衝，同建制派或者立法會主席打一場「無限之戰」。

另一方面，廣男相信盲反派會喺有限嘅空間下，利用提出修正案、發言問問題同埋「點人數」方式「拉布」，一句講晒，就係為咗拉倒「一地兩檢」方案而無所不用其極，所以廣男建議立法會主席處理盲反派「拉布」問題嘅時候，可以秉承委員會主席葉劉淑儀嘅硬朗作風，「邊個搞事嘅，就要Out！」

拖延「一地兩檢」無理據

事實上，如果今年立法會休會前仲未可以通過到高鐵「一地兩檢」方案，議案要等到下一個立法會年度先再審議，高鐵就冇可能喺今年9月通車，甚至乎係今年通車都好難，到時有損失嘅係邊個？就係我哋呢啲希望可以搵搭高鐵往番內地嘅香港人。盲反派覺得「一地兩檢」唔重要，咁係因為佢哋「冇興趣」番內地啫，但我哋呢啲普通市民唔係咁諗呀嘛！為著市民福祉、香港發展，唔該盲反派讓路啦！ 

原圖：大公報