「偷呃拐騙」黨立法會議員許智峯因為喺立法會強搶女EO手機，搞到自己畀警方拘捕件事嘅對錯本身就清清楚楚，不過「執迷不悟」嘅許智峯似乎仲認為自己好啱咁，佢喺被捕獲釋之後接受傳媒訪問，就感謝支持佢嘅人，話自己從政嘅決心同社會公義嘅堅持唔會改變，但喺技巧同方法上會「經一事長一智」。佢咁講法，佢唔係仲係覺得自己搶嘢係為咗正義，只係「手法」上有問題呀？！

從來都不知錯

老實講，囍雨一直都係覺得許智峯對於搶手機根本從來都無乜悔意，事關佢喺事後，一時話自己「獲得」手機，一時又話攞咗去，明明係「搶」佢偏偏唔肯認，就算最後出嚟公開道歉，都仲要屈政府人員侵犯私隱，橫睇掂睇都唔似係認錯，而似係話畀人聽政府唔啱，佢只係「方法」有問題啫！而家仲想暗示自己為「公義」，貫徹盲反派「只有人哋錯，冇自己唔啱」嘅野蠻Style！

對於社會公義點定義，當然係各有睇法啦，但囍雨必須要指出，許智峯「搶」手機絕對唔係公義嘅，第一如果唔係你班友係咁搞流會同「拉布」，政府又駛乜派人「睇住」立法會；第二就係就算許智峯個人唔喜歡被政府人員記低出入時間都好，咁絕對唔代表許智峯可以「搶」手機喎。囍雨極度懷疑許智峯係唔知道公義點解嘅，起碼囍雨留意咁耐時政新聞，從來未聽過有人公然「搶劫」，然後仲畀人讚佢係為「公義」先囉！

私隱專員證政府做法有理

其實，對於許智峯「強搶」手機一事，私隱專員黃繼兒早前都回應過，政府派人去立法會做嘢根本冇犯法，因為有關職務涉及重大嘅公眾利益，而議員身處嘅立法會又唔屬於私隱期望高嘅地方，收集資料地點更加喺公眾地方位置，唔係咩敏感個人資料。換句話說，政府做法完全冇問題，而家只係有盲反派嫌疑犯為咗開脫自己嘅罪行，老屈政府人員。

當盲反派係咁話許智峯已經認錯或者「罪不致死」嘅時候，囍雨覺得大家真係要平心靜氣睇下件事，如果一個立法會議員光天化日喺立法會搶嘢、偷睇人私隱，之後一邊「道歉」但又一邊屈政府唔啱，呢個人真係適合繼續做立法會議員？大家真係要睇清楚件事。

原圖：Takungpao