近年醜聞不斷，被批評為「偷呃拐騙」黨嘅民主黨，最近因為佢嘅立法會議員許智峯喺立法會「強搶」女EO手機，而令到該黨嘅「人氣」再度急升；當大家見到民主黨道歉兼譴責許智峯就以為佢會「大義滅親」，咁就真係錯晒喇。因為民主黨尤其係黨主席胡志偉近期係咁搬龍門，話以佢所見未至於要褫奪許智峯議席，仲拉埋另一立法會議員周浩鼎同前特首梁振英嚟講。廣男又非常好奇喇，如果胡志偉話一切要等刑事調查有結果，唔應該未審先判云云，咁佢哋冇證據又炒作UGL事件，算唔算係雙重標準呢？

雙重標準 包庇許智峯

對於胡志偉喺電視節目話唔可以未審先判，要等立法會調查委員會、司法調查有結果甚至法庭有判決先可以決定支唔支持立法會譴責許智峯，廣男俗啲講句呢啲都係bullshit；如果民主黨咁堅持程序公義、唔會搞未審先判同埋唔會搞政治鬥爭，咁大家真係要問下民主黨，林卓廷、尹兆堅同佢哋搞「天下為公」，聲稱要追究UGL事件，佢哋唔係正正喺無證據話梁振英有罪嘅情況下未審先判、搞政治鬥爭咩？胡志偉咁講，算唔算摑咗林卓廷佢哋一大巴掌先？如果係「曲線」想話林卓廷佢哋無風起浪，廣男又想胡志偉「公義」地講多啲喇！

借周浩鼎「掩護」嫌疑犯

更好笑嘅係，胡志偉話周浩鼎喺UGL事件調查委員會聽咗梁振英意見，件事嚴重過許智峯「搶」手機事件，廣男又想同胡志偉斟酌下，許智峯涉嫌犯下普通襲擊、不誠實使用電腦、刑事毁壞同埋妨礙公職人員執行職務罪名，乜周浩鼎聽咗梁振英意見修改文件會嚴重啲？仲有喎，周浩鼎係聽咗梁振英意見修訂委員會文件，但修訂內容令委員會調查範圍更廣、研究證據更仔細、更深入，引用胡志偉或者民主黨嘅思路，呢啲原意唔係應該要讚賞咩？

老實講，胡志偉喺盲反派入面，一向叫做比較正路架喇，點解佢今次為咗許智峯，不惜係咁搬龍門，甚至講埋啲可能會摑埋自己人嘅說話呢？一切咪又係議席作怪囉！大家諗下，以前民主黨喺高峰期有成十幾個立法會議員，而家得番果幾個，仲要許智峯係港島區唯一一個民主黨立法會議員，如果許智峯議席冇咗，而該議席畀建制派或者其他盲反派人士攞咗，咁民主黨邁向「收檔」行近一步喇！廣男夠膽斷言，就算許智峯畀法庭判埋坐監，民主黨都會「有理由」保佢，信不信由你。 

原圖：RTHK