廣男作為I.T.人，日日都會上網睇新聞，今朝一早，有條新聞突然彈出嚟，內容係話美國有十八個共和黨國會議員，聯署提名美國總統特朗普角逐2019年諾貝爾和平獎，原因係佢「堅持不懈向朝鮮施加最大壓力，以結束非法武器計劃，並為該地區帶來和平」，呢單新聞，真係唔識嚇一跳、識就得啖笑，一個四圍挑起火頭嘅人，竟然獲提名拎「和平獎」？唔好玩啦！

特朗普有和平過咩？

先唔好講朝鮮宣布棄核，功勞絕對唔止美國同特朗普，聯合國其他有份施以制裁嘅國家、兩韓峰會前同朝鮮首腦金正恩會面嘅中國國家主席習近平等等，全部都有功勞，美國國會議員將功勞畀晒自己總統，講到底咪又係以「天朝大國」自居，覺得呢個世界所有國家都要同佢號令，所有嘅問題都要美國出手先搞得掂。

朝鮮棄核，當然係世界共同願望，廣男唔敢講美國冇出力，但特朗普上任之後，外交上除咗朝鮮問題，其實仲做咗好多好受到爭議嘅事，好似前一排繞過聯合國安理會，擅自聯同英國、法國兩個傳統盟友轟炸敘利亞咁，呢個舉措明明就係不折不扣嘅霸道，咁樣都稱得上和平咩？

又打仗又唔理環保

唔講打仗，特朗普喺環保上推行嘅政策同樣係自私自利，相信大家會記得，美國國宣佈退出加強對氣候變化威脅應對嘅《巴黎協定》，原因係《巴黎協定》對美國構成經濟負擔，令美國愈來愈貧窮咁話。美國作為全球第二大碳排放國，本身對整個地球已經造成負擔，而家一句「好窮」就可以退出，特朗普真係「好和平」囉！

唔講打仗、唔講環保，不如又講吓外交吖；特朗普不單承認耶路撒冷係中東盟友以色列嘅首都，更加決定將美國駐當地大使館遷到耶路撒冷，呢個決定隨即引起內鄰近多個中東國家不滿。查實以往多個美國總統，一直都採取拖字訣唔肯搬遷大使館，全因為大家都清楚知道，將大使館由特拉維夫遷到耶路撒冷，唔單止會阻礙「以巴和談」進程，更加會令中東本身已經複雜嘅政治同宗教問題火上加油，有分析甚麼批評，特朗普此舉，其實即係將中東火藥庫引爆！

提名特朗普係侮辱「和平獎」

特朗普做埋做埋咁多「壞事」，但仍然可以獲得提名和平獎，本身係對和平獎一個天大侮辱。不過大家又唔需要咁介懷嘅，因為和平獎提名門檻本身極低，任何國家嘅國家元首、國會議員、政府官員、內閣成員，全部都有資格提名。由於有資格提名嘅唔少都係政客，故此近年和平獎亦已經變得高度政治化，連劣跡斑斑嘅特朗普都話要玩「和平獎」，唔怪得之前有班美國政客會走去提名主導香港「違法佔領」嘅雙學三人啦，講到尾咪又係得啖笑囉！

原圖：白宮YouTube頻道截圖