民主黨立法會議員許智峯搶政府女職員手機證據確鑿，佢自己亦承認行為唔妥當，正常稍有廉恥嘅政治人物，當知道自己行為衰咗，正路做法肯定係不斷道歉，直到社會原諒為止。偏偏許智峯就唔似係有廉恥嗰類人喇，日前雖然喺FACEBOOK道歉，但又同時死撐話自己所作所為只係針對政府侵犯議員「私隱」，擺明係最典型嗰種轉移視線手法。好彩，私隱專員公署亦唔畀佢利用，尋晚火速發信回應許智峯，重申政府記錄議員出入會議廳並無侵犯私隱，狠狠咁摑許智峯一大巴。

私隱署證政府行動合法

私隱專員黃繼兒話，政府山嘅功能包括管理社會、經濟及民生事務，而立法會所審議嘅議案，同政府功能息息相關，所以政府有責任促使立法會能適時審議議案；況且，政府人員只係記錄立法會議員喺立法會大樓內公眾地方行蹤，呢樣「並唔屬於」敏感資料，加上收集呢類資料目的係與為達至「正當」同「合法」目的，所以並不屬於「侵犯私隱」。

查實私隱專員公署早喺4月25號、即係許智峯醜聞曝光冇幾耐就已經迅速發新聞稿，確認政府人員執行通傳同應變職務並不牴觸《私隱條例》，許智峯冇可能冇睇過聲明，佢再次公開質疑政府侵犯私隱，根本就係「死撐」。老老實實，唔好話許智峯本人大學係讀法律嘅，就算冇受過法律專員訓練，稍稍有常識都知道立法會議員喺公眾範圍嘅行蹤，點都冇可能係「私隱」，如果許智峯真係唔知，咁佢思維同常識就真係「異於常人」喇。

議員行蹤涉公眾利益

去到呢一步，絕大部份市民都應該要問一個問題，點解許智峯咁介意政府知道佢有冇喺會議廳呢？佢作為民選議員，最重要責任正正係「開會」、「發言」同「投票」，呢三種責任都一定要立法會議員身處會議廳先可以做到，政府為咗確保會議廳夠人開會，可以按時審議法例同撥款，做紀錄確保隨時知道有幾多議員喺會議廳根本就正常過正常。大家記住喎，係記錄咋喎，唔係干預議員行動自由喎，呢啲紀錄亦唔會公開架喎！

講到底，許智峯始終係死不認錯，一於狡辯到底，而更卑鄙嘅係，佢學埋自己黨友林卓廷啲衰嘢，想將執法部門擺上檯，甚至係想將私隱專員公署捲入政治旋渦！私隱專員公署今次火速回應許智峯嘅無理指控，做法值得一讚，而家證明咗政府冇侵犯私隱啦，咁你許智峯肯衷誠認錯道歉、兼且即時辭職以示負責未呢？

原圖：RTHK