中聯辦一向予人「好神秘」嘅感覺，有啲人唔知佢到底做咩，亦有啲人話佢哋係「西環治港」，實行徹夜將佢「妖魔化」，甚至借此連中央政府都「妖魔化」埋。中聯辦日前舉辦咗一場開放日，畀公眾去參觀中聯辦嘅會客室、員工餐廳以及活動室等地方，期間中聯辦主任王志民仲「親身落場」同市民切磋乒乓球，場面可謂相當融洽。其實，廣男覺得有啲人對中聯辦嘅「指指點點」，有時未免過於「抬舉」，如果中聯辦真係畀啲人講到咁恐怖，又點會肯開放畀人參觀呢？

市民排隊入中聯辦

雖然廣男身有要事，唔可以好似其他市民咁排隊去參觀中聯辦，但廣男對於中聯辦嘅印象，一定唔係盲反派班人諗到咁黑暗。事關廣男有朋友喺政界工作，廣男同對方傾計講開中聯辦嘅時候，果位朋友其實講得好中肯、又正面，大抵意思就係話有啲人覺得「西環」喺背後指指點點，其實中聯辦不知做幾多實事，佢哋一班從政嘅人有時要去內地交流，需要一啲中間人幫手做協調，中聯辦通常最幫得手；或者有事要聯絡到內地部門，中聯辦一樣可以幫到手。呢位朋友仲話，有啲政客係咁「妖魔化」中聯辦，係因為佢哋從只視中聯辦為「攻擊目標」而冇諗過中聯辦其實係同內地聯絡嘅一度橋樑。

講番中聯辦嘅參觀日，廣男從新聞報道睇到一個幾有趣嘅現象，就係中聯辦嘅圖書館，竟然有「醜陋的中國人」同埋「中國天朝主義與香港」等書籍，睇嚟呢個被外界只為幾「封閉」嘅聯絡辦公室，睇啲書都幾「開放」，就算政見唔同嘅書，都願意「吸納」，而且仲要係畀記者影到相果隻；而中聯辦主任王志民更加可以用非常友善嚟形容，佢自己除咗同參觀者合照之外，仲同市民打乒乓波。綜合種種觀察，話中聯辦封閉或者想「妖魔化」佢，其實都講得唔係咁公道。

借中聯辦走到內地

隨住內地香港嘅交流更加緊密，廣男覺得中聯辦絕對可以繼續扮演橋樑角色，如果盲反派願意番內地去唔同嘅大灣區城市做考察，廣男建議佢哋都可以造訪下中聯辦；大家知啦，其實內地交流、旅行團就唔係得建制派搞嘅，有啲打住「本土」旗幟嘅政黨，一樣會帶市民番內地交流或者玩。如果盲反派願意同中聯辦打好關係，對於內地香港以至自己政黨番內地交流、學習，廣男相信都非常有幫助；前提係，盲反派要先放下心魔，唔好成日「以小人之心，度君子之腹」。

原圖：文匯報