32個立法會議員到大灣區考察，當中包括9個盲反派議員。同以往唔同嘅係，以前立法會議員去內地考察，通常傳媒嘅焦點就係啲盲反派議員「點玩嘢」，而今次考察嘅亮點，就變成係班盲反派議員竟然「冇玩嘢」，真係「no news is good news」。喺今次考察，班盲反派議員反應都好似好正面咁，有盲反派人士話內地創科發展大、為香港帶來警號，又有盲反派人士話睇到大灣區近年改變，政府要作出政策回應；其實，上屆政府一早就話要成立創科局推動創新科技發展啦，你班盲反派喺度「拉布」拖延，而家仲好意思叫政府用政策回應？咁樣算唔算係貓哭老鼠先？

唔講由自可 一講把幾火

今次立法會議員考察完大灣區之後，民主黨主席胡志偉就話，內地創科發展力度之大，為香港帶來警號，仲話港府要投放資源同改變不容有失嘅心態；而另一盲反派議員莫乃光，就話透過今次考察，深深睇到大灣區各方面近年嘅改變，特別係政策、人才規劃同創科發展，仲促請政府作出政策回應。聽到佢哋咁講，唔知真係以為佢哋好支持香港發展創新科技，但實情係點呢？

創科局多次被盲反派「拉倒」

呢個時候，囍雨又要同大家回一回帶。其實喺2012年5月，當時嘅候任特首梁振英已經提出重組政府架構，要增設「創科局」，但畀立法會Ban咗，之後2014年、2015年年頭，創科局都係畀盲反派「拉布」或者拖延下搞到「難產」，特區政府要去到2015年年尾，喺當時財委會主席「剪布」之下，先過到創科局撥款。當時胡志偉嘅民主黨議員有冇「拉布」？莫乃光又有冇縱容「拉布」行為先？而家話特區政府要喺呢方面「做多啲嘢」，會唔會有啲諷刺呢？

老實講，盲反派議員願意到內地、大灣區考察，囍雨當然表示歡迎，但係喺佢哋畀個「手指公」內地嘅創科發展同時，其實係佢哋一手抹煞本港創科政策嘅進程，佢哋話港府要做嘢嘅時候，有冇諗過係佢哋唔畀政府做嘢先？創科局雖然最後都喺政府努力之下成立咗，但足足拖咗三年有多，須知道喺IT行業嚟講，可能兩、三年已經係一個generation。囍雨就諗，如果盲反派真係覺得政府要喺創新科技方面做多啲嘢，囍雨就「聽其言，觀其言」，睇下政府再有新嘅創科政策果時，到底盲反派係真心支持，定有心玩嘢。人在做，始終天在看的！  

原圖：RTHK