「違法佔領」發起人戴耀廷去台灣播「獨」引起各界猛烈批評，亦牽生咗香港應該幾時就《基本法》23條立法嘅問題；對於23條立法，盲反派從來都係貫徹始終地反對，一來因為23條立法會令佢哋向來反中亂港嘅言論變得「危危乎」，二來因為反23條立法，可以話係盲反派反政府、中央嘅「殺手鐧」，而且係萬試萬靈果隻。今日，囍雨睇新聞見到盲反派元老、資深大律師李柱銘都寫文講起23條，仲講到「所謂的港獨問題根本是中共治港者無中生有」，囍雨又要忍唔住問一句，李柱銘到底係唔知咩事，定係佢覺得所有問題都可以入政府、中央「數」呢？

港獨問題由盲反派而起

如果要講「港獨」問題點嚟，真係寫五千字都講唔晒，不過對於李柱銘嘅講法，囍雨覺得可以好簡單就駁斥佢。首先，好幾年前已經有盲反派人士喺示威嘅時候高舉香港旗、龍獅旗，甚至話「香港要獨立」，之後甚至有「獨」派人士衝去駐港解放軍軍營示威被捕。喺違法佔領期間，又有學生組織打出「命運自主」嘅口號，直頭最近一、兩年就更加唔駛講啦，擺明要搞「港獨」嘅梁天琦、陳浩天、梁頌恆、游蕙禎等人仲參加立法會選舉，後兩者仲要贏埋（最後因為宣誓時播「獨」、辱華被DQ），咁多活生生例子顯示盲反派政客搞「港獨」，李柱銘真係認為「港獨」係治港者「無中生有」？

或者李柱銘嘅意思，係「港獨」議題係由治港者開始炒起，但囍雨想講李柱銘嘅想法都係錯到離晒譜；事關如果李柱銘想話事件由政府甚至中央炒起，囍雨想講只要有人要搞不符合國家憲法、《基本法》嘅「港獨」，政府官員等等都絕對有義務指出「港獨」言行有問題。而家李柱銘唔話鼓吹「港獨」嘅人有錯，反而話勇敢點出「港獨」禍害嘅人不是，呢啲算唔算係「強盜邏輯」？李柱銘呢種倒是成非嘅功架，又算唔算係大狀本色？

又係因為普選？

根據囍雨對李柱銘文章嘅理解，無論佢講「港獨」、23條立法，講到尾佢最想講嘅，都係佢向來非常掛心嘅普選問題，喺呢度囍雨又要提下李大狀，2017嘅政改方案係盲反派有份否決架，唔好一邊抹煞500萬人嘅投票權，一邊又喺度講政府啦，唔該！

原圖：RTHK