港大法律「學者」戴耀廷大搖大擺去台灣講「港獨」，搞到畀全城圍插。一向剩係識大叫：「我冇錯！」嘅戴耀廷，一時話呢啲只係學術討論、一時又聲稱自己唔係搞「港獨」；對於呢啲論點，廣男本身已經疑惑，如果佢唔係搞「港獨」，點解要去「五獨」論壇呢？不過咁都唔算驚人，更驚人嘅係，呢位「學者」最近接受傳媒訪問時，竟然將自己推向更高層次，大言不慚話自己係「教育家」，出席「五獨」論壇係以「教育家」身份刺激大家思考喎，睇到呢度，應該唔使解釋都知件事有幾「狂野」啦！

戴耀廷冇資格自稱「教育家」

嗱，對於戴耀廷自稱係「教育家」，廣男首先要問下戴耀廷，佢知唔知咩叫做「教育家」呢？學術啲去講，能夠稱得上叫「家」，至少做到「建言立說」，可以建構到受人推崇嘅一家之言。戴耀廷得唔得呢？有咩咁嘅學術同社會地位呢？一個連正教授都做唔到、唔做研究、唔出論文嘅「學者」，到底憑乜叫教育家？唔講學術成就，「教育家」都未必一定要讀書叻嘅，例如田家炳、邵逸夫等等，多年來捐咗都不知幾多身家出嚟助學辦學，令到唔少市民有接受教育嘅機會。呢類善長，即使完全冇學術地位都好，一般人都會尊稱佢哋為「教育家」，呢點亦唔會有人異議。 

再隨心啲，大家求其上網search下咩叫「教育家」，以中國嚟講，率先彈出嚟嘅肯定係孔子、荀子等人，近啲嘅就有諸如胡適、蔡元培等等。戴耀廷將自己同呢班「真教育家」並排，會唔會太過貽笑大方呀？到底佢知唔知個「醜」字點寫？好，再退一億步講，如果話戴耀廷真係「教育家」，咁就真係令人憂慮喇，唔通佢灌輸違法思想、推動違憲「運動」，竟然厲害到「自成一家」？莫講話「教育家」咁偉大，戴耀廷嘅品行連稱呼佢為「教育工作者」都嫌侮辱咗一班為人師表嘅好老師。

國有國法 校有校規

仲有仲有，大家唔好唔記得呀，戴耀廷本身係一個「非常冇口齒」嘅偽君子，當初講明「違法佔領」過後會「俯首認罪」，今日就堅決反口，立心打官司打到底，乜呢啲又係講求「誠信」嘅「教育家」所為咩？大家唔好唔記得，除咗「走數」唔認罪之外，佔領三人組到而家都仲未交「違法佔領」本數簿出嚟！呢班人當初話過會公開交代帳目，還香港人知情權架，成班都滿口大話，仲夠膽話自己「教育家」？廣男話戴耀廷係「恬不知恥」就真！

戴耀廷係咪一個「教育家」，相信社會自有公正嘅評價，廣男喺度特別想講，「國有國法，家有家規」，點解每間學校都要有校規呢？如果一間學校啲學生可以話「違法達義」而唔守校規，又或者啲學生要「自決」，學校點管理、學生點番學係由佢哋決定，冇標準、冇秩序，咁間學校會變成點？學校甚至社會又會承受咩後果？唔講口齒、教人犯法、誤人子弟嘅如果都係「教育家」，咁「教育家」三個字就真係難聽過粗口囉！

原圖：Takungpao