涉及前特首梁振英嘅「UGL事件」已經擾擾攘攘已經差唔多四年，縱使各涉事單位都已經交代同澄清晒所有疑問，但民主黨仍然死咬唔放，近日更加發起「假調查、真抽水」嘅眾籌計劃。對於呢次行動，民主黨一直解答唔到，既然需要公開嘅資料已經公開晒，佢哋本身冇刑事調查權，點解籌款後會多咗證據？計囍雨話，呢次眾籌根本係一條非常毒嘅毒計，民主黨無論點擺位都抽到水，認真離譜呀！

眾籌查UGL全無程序公義

呢次針對「UGL事件」嘅眾籌，本身絕冇程序公義可言。的確，根據香港法律制度，民主黨係有權向法院提出私人檢控，但私人檢控弊端在於提出者本身並冇調查權，即係話根本唔可以拎到公開資料以外嘅任何內容。

無論包裝到幾天花龍鳳都好，冇調查權就係冇調查權，就算民主黨飛去英國同澳洲都一樣，人哋國家嘅執法同監管機構更加唔可以向佢哋透露事件嘅任何內容，呢個就係法治同程序公義喇！講真吖，立法會之前成立咗個「UGL事件調查委員會」，但事件中所有持份者，全都當呢個委員會冇到，原因正正係因為個委員會「沒有刑事調查權」，咁民主黨憑乜認為派幾個人飛過去就可以拎到更多「機密」資料呢？

民主黨只想將撕裂社會關係

結果，囍雨聽完尋日民主黨個記者會後，心中所有疑惑終於一掃而空；民主黨根本唔在意呢次眾籌有冇調查結果，因為呢次活動對佢哋嚟講絕對係「只贏不輸」；首先，民主黨喺記者會話，如果梁振英向佢哋提出誹謗訴訟，佢哋係會動用市民嘅捐款去抗辯嘅。即係話，梁振英為咗維護個人名聲，好可能被迫要動用自己錢去提告尋公義，但民主黨上下只會用市民嘅捐款去打官召，自己一蚊都唔使出。

為咗維護個人聲譽，梁振英要用自己錢本身已經好諷刺，如果佢真係被迫提出訴訟，估計民主黨到時一定會貓又扮「受害者」、甚或被「政治逼害」，哭喪著臉說因為梁振英「阻撓」，所以佢哋「被迫」動用市民嘅捐款等等，目的就係將梁振英「擺上檯」推向市民對立面，甚至以呢個作藉口繼續炒作事件。對民主黨嚟講，呢招「一石二鳥」，我唔知民主黨同CY係唔係有十冤九仇，但講真呢招用喺佢哋任何政敵都得，好歹毒呢！

名副其實的毒招

再者，囍雨尋日亦講過，民主黨今次眾籌後，幾乎肯定會委託該黨「大老」何俊仁間律師行去進行法律程序，即係話市民筆捐款，到最後都一定益到民主黨，或親民主黨啲律師們，真係Friend過打Band，可憐佢班支持者竟被呢班人呃完一次又一次，到頭來啲辛苦錢原來係畀民主黨全方位咁食晒，睇完囍雨分析後，係唔係認同民主黨今次呢招真係夠晒毒呢？客觀效果咪就係，佢哋出名、市民埋單、梁振英破財囉，乜呢個又係公義咩？

原圖：天下為公Facebook