噚日係香港電影金像獎頒獎禮，廣男同屋企人食完飯即刻飛的番屋企睇邊個攞最佳男、女主角，當喺直播度睇到古天樂首奪最佳男主角嘅時候，雖然已經有屋企人瞓左覺，但廣男都係忍唔住拍手掌，仲畀隔離位屋企人笑廣男「白痴」。老實講，如果係其他人攞到最佳男主角，廣男真係未必會咁高興，事關廣男欣賞古天樂，除咗因為鍾意睇佢啲戲之外，廣男係真心欣賞古天樂拍戲賺錢之餘，願意捐錢出嚟做善事、幫助其他人嘅個性。一個人要搵到錢唔係最難，最難係呢個人辛辛苦苦搵到錢，又願意將部分捐出去幫人，古天樂喺廣男心目中，係真好漢！

密密捐款助貧困兒童

作為一個80後，廣男真係細細個就睇古天樂啲戲大，如果大家對古天樂嘅過去有啲印象，都會知道佢曾經誤入歧途，之後加入咗娛樂圈。娛樂圈向來係一個大染缸，入到娛樂圈易爛玩甚至易學壞，好似古天樂咁「越紅越有品」嘅人，確實少見，廣男之所以欣賞佢，唔只係因為佢演戲用心，而係佢對社會、國家嘅貧窮兒童有心！

如果廣男記憶冇錯，曾經有人同古天樂講，叫佢唔好接咁多爛片嚟拍，而古天樂嘅回應，大概就係話好多人「等緊佢開戲」。原來，古天樂自2000年代開始，就喺內地捐錢起學校，據報已知佢有份資助嘅小學，已經近100間，佢甚至會派人去睇住啲學校工程嘅質量，自己又會秘密到鄉村做義工，而每一次都冇通知傳媒嘅。

老實講，一個人搵到錢，除咗交稅之外，佢有權用晒啲錢嚟滿足自己各種慾望，亦有權將呢份「福氣」分享出去，幫助社會裡面有需要嘅人。可能有人覺得，古天樂拍咁多戲，拍到已經有啲爛，但如果我哋用另一個角度睇，古天樂拍咁多Job，原來有不少收入都捐出嚟幫人，成個觀感唔知會唔會唔同好多呢？呢個世界所欠缺嘅，有時唔係讀書或者做嘢叻嘅人，而係默默付出、願意幫人嘅好人，廣男相信古天樂就係其一。

註：古天樂喺《殺破狼‧貪狼》嘅演出非常好，攞獎都係實至名歸。

原圖：網上圖片