民主黨為咗可以繼續做「政治騷」、搏出位，搞咗個眾籌行動叫「天下為公」，聲稱要繼續就UGL事件「追究」前特首梁振英；不過，民主黨立法會議員林卓廷同佢哋一班律師「老屈」人都明顯好唔專業，有意無意間抹走晒當事人甚至UGL嘅關鍵回應，連基本事實都搞錯晒。一向極力支持民主黨、同樣鍾意「老屈」人嘅《生果報》，喺呢個時候梗係「全力配合」民主黨啦，今日仲出埋社評加入「追究」梁振英行列，不過佢哋嘅文章同民主黨嘅聲明一樣，全部都謬誤處處，到底佢哋係冇道德吖，定係為咗攻擊政見唔同嘅人，就連傳媒道德都唔顧呢？（當然前提係《生果報》仲有道德嘅話！）

有錢就證據？

UGL事件畀傳媒報道咗幾年，又有政客去埋廉署公署「舉報」事件，如果有咩證據或者證明有人犯咗法，好可能已經提出咗司法程序；而家民主黨話要籌錢追究，《生果報》又響應佢講法聲稱要籌錢做「民間調查」，囍雨真係好好奇，呢班政客籌完錢後，點會「變到」啲證據出嚟呢？雖然香港法律係容許普通市民提私人檢控，但由於一般市民係冇「搜證」嘅權力（當然唔係指公開資料），咁試問民主黨請到邊個律師咁犀利，可以收錢後用「特權」去搵到所謂「證據」呢？

另一個問題，就係無論係民主黨或者係《生果報》都好，點解佢哋都認定律政司一定要告梁振英？囍雨想問下，係咪梁振英無犯罪，因為政治理由就要告？或者係咪盲反派、《生果報》主觀覺得人哋有罪，律政司就要聽佢哋講去提告？佢哋唔知咩叫「無罪假定」、「司法獨立」咩？又或者咁講，如果有一日律政司臚列出證據，講清楚點解唔告梁振英、依法辦事，點解仍然要「夾硬」告梁振英？呢啲咪正正係呢班人口中嘅「政治檢控」囉？

似是而非的「道理」

老實講，如果你問囍雨《生果報》篇社評寫成點，囍雨只可以話係「亂嚟」。除咗以上嘅謬論，社評所舉出嘅例子全部都有問題，例如佢拎「新地案」嚟同UGL事件相比，真係識嘅畀佢笑死，唔識嘅畀佢嚇死；《生果報》真係唔知道梁振英同UGL簽離職協議嘅時候戴德梁行知情而且授權？真係唔知道梁振英同UGL協議時，寫明唔可以有「利益衝突」咩？一有利益衝突，梁振英就唔需要履行協議上嘅工作啦！又或者《生果報》衰到連梁振英、UGL聲明都唔睇、冇睇，就亂咁作故仔去砌生豬肉誣衊梁振英？如果《生果報》知道而唔寫，咁就擺明係「老屈」啦；相反，如果《生果報》話自己唔知嘅，咁囍雨又要問下你哋到底點做傳媒先得喎！

民主黨、《生果報》搞咁多嘢，其實都係想「人格謀殺」梁振英啫，但大家要諗下，傳媒嘅責任就係如實報導事件或者根據事實做評論，UGL事件其實UGL自己、率先報道事件嘅澳洲傳媒、梁振英甚至政府都已經清楚說明過，如果《生果報》執意唔顧事實玩「老屈」，係咪濫用「第四權」嘅權力？仲有冇傳媒道德可言？當盲反派以至《生果報》係咁話要捍衛法治嘅時候，其實佢哋無證無據係咁詆譭其他人，根本係破壞緊法治先啱！

原圖：Takungpao